அமைச்சரவையில் இருந்து வெளியேறுவோம் என்று தான் கூறிய கருத்து தவெகவை மிரட்டுவதற்காக அல்ல, மாறாக தங்கள் கட்சியின் அரசியல் சுதந்திரத்தை உறுதிப்படுத்துவதற்காகவே என்று விடுதலைச் சிறுத்தைகள் கட்சித் தலைவர் திருமாவளவன் விளக்கம் அளித்துள்ளார்.

பதவிக்காகத் தான் தவெகவுக்கு ஆதரவு கொடுத்தோம் என்ற விமர்சனங்களுக்குப் பதிலளித்த அவர், பதவியில் இருந்து வெளியே நின்றாலும் தவெகவுக்கு எங்களால் ஆதரவு தர முடியும் என்றும், ஆட்சிக்கு எந்த ஆபத்தும் வராது என்றும் குறிப்பிட்டார்.

கொள்கை ரீதியாகப் பெரியார், அம்பேத்கர் மற்றும் சமூக நீதி போன்ற விஷயங்களில் தவெகவுடன் ஒத்த கருத்துடையதாலேயே தாங்கள் ஆதரவு அளிப்பதாகவும், பாஜ போன்ற கருத்தியல் முரண்பாடுள்ள கட்சியுடன் கூட்டணி சேர்ந்தால் தான் அந்த விமர்சனங்களுக்கு அர்த்தம் உண்டு என்றும் அவர் கூறினார்.

மேலும், தவெக ஆட்சி அமைக்கத் தேவையான ஆதரவை அவர்கள் கேட்டபோது, அதிமுக அல்லது பாமகவின் ஆதரவை அவர்கள் எளிதாகப் பெற்றிருக்க முடியும் என்று சுட்டிக்காட்டிய திருமாவளவன், ஆனால் மதச்சார்பற்ற கூட்டணி வேண்டும் என்ற கொள்கை அடிப்படையில் தான் தவெக தங்களை நாடியதாகத் தெரிவித்தார்.

“>

 

இது குழப்பம் அல்ல, அரசியல் நுட்பம் என்று குறிப்பிட்ட அவர், கூட்டணி குறித்து இன்னும் பேச்சுவார்த்தை தொடங்கவில்லை என்பதால், இதில் தேவையற்ற உள்நோக்கம் கற்பிக்க வேண்டாம் என்று கேட்டுக்கொண்டார். திருமாவளவனின் இந்தப் பேச்சு, தவெக உடனான கூட்டணி மற்றும் தற்போதைய அரசியல் சூழல் குறித்த தெளிவை ஏற்படுத்தியுள்ளது.