சிந்து நதி நீர் ஒப்பந்தத்தை இந்தியா தடுத்து நிறுத்தினால், அதற்கு எதிராக ராணுவ நடவடிக்கை எடுக்கப்படும் என்று பாகிஸ்தான் பாதுகாப்பு அமைச்சர் குவாஜா ஆசிஃப் மீண்டும் எச்சரித்துள்ளார். கடந்த ஆண்டு பஹல்காமில் நடந்த பயங்கரவாதத் தாக்குதலைத் தொடர்ந்து, 1960-ஆம் ஆண்டு போடப்பட்ட சிந்து நதி நீர் ஒப்பந்தத்தை இந்தியா இடைநிறுத்தியது.

இந்நிலையில், இந்தியா தனது நீர் விநியோகத்தை முற்றிலுமாகத் தடுக்கும் வேகத்தில் செயல்படுவதாகவும், இது பாகிஸ்தானின் தேசியப் பாதுகாப்பிற்கு அச்சுறுத்தலாக இருப்பதாகவும் ஆசிஃப் குற்றம் சாட்டியுள்ளார். பாகிஸ்தானின் நீர் தேவைக்கு அச்சுறுத்தல் ஏற்பட்டால், இந்தியா மீது போர் தொடுக்கவும் தயங்கமாட்டோம் என்று அவர் பகிரங்கமாகத் தெரிவித்துள்ளார்.

பாகிஸ்தானில் தற்போது நிலவும் கடுமையான தண்ணீர் பற்றாக்குறை, சிந்து மற்றும் பலுசிஸ்தான் போன்ற மாகாணங்களில் பெரும் பொருளாதாரப் பேரழிவை ஏற்படுத்தி வருகிறது. வடமேற்கு மற்றும் தாது கால்வாய்களில் நீரின் அளவு வெகுவாகக் குறைந்துள்ளதால், உள்ளூர் மக்கள் தண்ணீர் தட்டுப்பாட்டினால் பெரும் அவதிக்குள்ளாகியுள்ளனர்.

மேலும், பஞ்சாப் மாகாணம் சட்டவிரோதமாகத் தண்ணீரை எடுப்பதாகவும், இந்தியா நீரியல் தரவுகளை மறைப்பதாகவும் பாகிஸ்தான் தரப்பில் புகார்கள் எழுப்பப்பட்டுள்ளன.

பயங்கரவாத ஆதரவை பாகிஸ்தான் நிறுத்தும் வரை இந்த ஒப்பந்தம் இடைநிறுத்தப்பட்டிருக்கும் என்பதில் இந்தியா உறுதியாக உள்ள நிலையில், இரு நாடுகளுக்கும் இடையே நீர் தொடர்பான பதற்றம் நாளுக்கு நாள் அதிகரித்து வருகிறது.