அமெரிக்காவுக்கும் ஈரானுக்கும் இடையே போர் நிறுத்தம் ஏற்பட்டால், ஹோர்முஸ் ஜலசந்தியில் உள்ள கண்ணிவெடிகளை அகற்றத் தனது இராணுவத்தை அனுப்புவது குறித்துப் பரிசீலிப்பதாக ஜப்பான் அறிவித்துள்ளது. ஜப்பானிய வெளியுறவு அமைச்சர் தோஷிமிட்சு மொட்டேகி, கடல்வழிப் போக்குவரத்து முழுமையாகத் தடைப்பட்டால் மட்டுமே இந்த நடவடிக்கை எடுக்கப்படும் என்று தெளிவுபடுத்தியுள்ளார்.

இரண்டாம் உலகப் போருக்குப் பிந்தைய ஜப்பானிய அரசியலமைப்புச் சட்டங்கள் நேரடிப் போரில் ஈடுபடக் கட்டுப்பாடுகளை விதித்தாலும், 2015-ஆம் ஆண்டு பாதுகாப்புச் சட்டத்தின்படி நட்பு நாடுகளுக்கு அச்சுறுத்தல் ஏற்படும் போது தற்காப்புப் படைகளை அனுப்ப ஜப்பானுக்கு அனுமதி உண்டு.

தனது எண்ணெய் தேவையில் 90 சதவீதத்தை இந்த வழித்தடம் மூலமே ஜப்பான் பூர்த்தி செய்வதால், இந்தப் பாதையின் பாதுகாப்பு அந்நாட்டிற்கு மிக முக்கியமானது. ஜப்பானியப் பிரதமர் சானே டகாயிச்சி சமீபத்தில் அமெரிக்க அதிபர் டொனால்ட் ட்ரம்பைச் சந்தித்து இது குறித்துப் பேசியுள்ளார்.

அப்போது, தனது சட்ட வரம்புகளுக்கு உட்பட்டு மட்டுமே ஜப்பானால் உதவ முடியும் என்று அவர் குறிப்பிட்டுள்ளார். தற்போது ஜப்பான் நேரடியாகப் போரில் ஈடுபட விரும்பவில்லை என்றாலும், அமைதி திரும்பிய பிறகு கடல்வழிப் பாதையைச் சீரமைப்பதில் ஒரு குறிப்பிட்ட பங்கினை வகிக்கத் தயாராக உள்ளது.