இந்தியாவில் வேகமாக அதிகரித்து வரும் எரிசக்தித் தேவைகள் மற்றும் சமீபத்திய ‘வீட்டிலிருந்து வேலை’  வழிகாட்டுதல்கள் குறித்து சீனாவின் அரசு ஊடகமான ‘குளோபல் டைம்ஸ்’ ஒரு முக்கியத் தலையங்கம் எழுதியுள்ளது.

இந்தியாவின் வேகமான பொருளாதார வளர்ச்சி மற்றும் நகரமயமாக்கல் காரணமாக எரிசக்தி நுகர்வு தொடர்ந்து உயர்ந்து வருவதை ஒப்புக்கொண்டுள்ள அந்த நாளிதழ், இந்தியாவின் உள்நாட்டு உற்பத்தித் திறன் குறைவாக இருப்பதால் அது இறக்குமதியையே பெரிதும் சார்ந்துள்ளது என்று குறிப்பிட்டுள்ளது.

தற்போதைய புவிசார் அரசியல் பதட்டங்களால் சர்வதேச சந்தையில் எண்ணெய் மற்றும் எரிவாயு விலைகள் அடிக்கடி மாறுவது இந்தியாவின் எரிசக்திப் பாதுகாப்பிற்குப் பெரும் சவாலாக மாறியுள்ளது என்றும், இதனால் 2030-க்குள் 500 ஜிகாவாட் புதுப்பிக்கத்தக்க எரிசக்தித் திறனை அடையும் இந்தியாவின் லட்சிய இலக்கு வெறும் தேர்வாக இல்லாமல் ஒரு அவசியத் தேவையாக மாறியுள்ளது என்றும் சீனா விவரித்துள்ளது.

இந்தச் சூழ்நிலையில், சூரிய மின்தகடுகள் மற்றும் காற்றாலைகள் போன்ற புதுப்பிக்கத்தக்க எரிசக்தி உபகரணங்கள் தயாரிப்பில் உலகளவில் முன்னணியில் இருக்கும் சீனாவுடன் இந்தியா தனது வணிக ஒத்துழைப்பை அதிகரிக்க வேண்டும் என்று குளோபல் டைம்ஸ் பரிந்துரைத்துள்ளது.

கடந்த 2025-ஆம் ஆண்டில் இரு நாடுகளுக்கு இடையேயான வர்த்தகம் 12 சதவீதம் அதிகரித்து 155.6 பில்லியன் டாலர் என்ற சாதனை அளவை எட்டியுள்ளதைச் சுட்டிக்காட்டி, புதுப்பிக்கத்தக்க ஆற்றல் துறை இரு நாடுகளின் உறவுக்கு ஒரு புதிய வளர்ச்சி இயந்திரமாக மாறக்கூடும் என்று அது தெரிவித்துள்ளது.

எனவே, இரு நாடுகளின் பொருளாதார நலன்களைக் கருத்தில் கொண்டு, இந்தியா தனது கொள்கை மட்டத்தில் கூடுதல் வெளிப்படைத்தன்மையைக் கடைப்பிடித்து, சீன வர்த்தக ஒத்துழைப்பிற்கான தடைகளை அகற்ற வேண்டும் என்று அந்தச் சீன அரசு ஊடகம் வலியுறுத்தியுள்ளது.