பெங்களூரு அஞ்சனாநகர் பகுதியில் 27 வயது இளைஞர் கிரண், அவரது காதலி பிரேமாவால் கொடூரமான முறையில் எரித்துக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது. இருவரும் தனியார் தொலைத்தொடர்பு நிறுவனத்தில் பணிபுரிந்து வந்த நிலையில், கடந்த சில நாட்களாக இவர்களுக்குள் கருத்து வேறுபாடு இருந்து வந்ததாகக் கூறப்படுகிறது.

சம்பவத்தன்று கிரணை தனது வீட்டிற்கு வரவழைத்த பிரேமா, ‘மேற்கத்திய பாணியில்’ தனது காதலை வெளிப்படுத்தப் போவதாகக் கூறி, கிரணின் கை, கால்களைக் கட்டி கண்களைத் துணியால் மறைத்துள்ளார்.

இதனை விளையாட்டாக நினைத்த கிரண் ஒத்துழைக்க, பிரேமா திடீரென அவர் மீது மண்ணெண்ணெய் ஊற்றி தீ வைத்துள்ளார். இதில் பலத்த காயமடைந்த கிரண் சம்பவ இடத்திலேயே உயிரிழந்தார்.

இந்தக் கொலை முன்கூட்டியே திட்டமிடப்பட்டது என்று போலீசார் சந்தேகிக்கின்றனர், ஏனெனில் இதற்காக மண்ணெண்ணெய் தயார் நிலையில் வைக்கப்பட்டிருந்தது விசாரணையில் தெரியவந்துள்ளது.

கிரண் தன்னை விட்டு விலகிச் செல்வதாக நினைத்த ஆத்திரத்தில் பிரேமா இந்த விபரீத செயலைச் செய்திருக்கலாம் என்று கருதப்படுகிறது.

மேலும், இந்தச் சம்பவத்தை பிரேமா தனது செல்போனில் படம்பிடித்தாரா என்பது குறித்தும் போலீசார் ஆய்வு செய்து வருகின்றனர். தற்போது பிரேமாவைக் கைது செய்துள்ள பேடரஹள்ளி போலீசார், இந்தத் திட்டமிட்ட கொலை குறித்து தீவிரமாக விசாரணை நடத்தி வருகின்றனர்.