பாகிஸ்தான் மற்றும் தலிபான் இடையிலான உறவு முன்னெப்போதும் இல்லாத வகையில் மிக மோசமான நிலையை எட்டியுள்ளது. சமீபத்தில் பாகிஸ்தான் ராணுவம் நடத்திய வான்வழித் தாக்குதல்களுக்குப் பிறகு, தலிபான் அமைப்பு மிகவும் ஆக்ரோஷமான நிலையை எடுத்துள்ளது.
மேலும் “இனிமேல் பேச்சுவார்த்தை நடத்துவதில் எந்த அர்த்தமும் இல்லை, எங்கள் மீது நடத்தப்பட்ட தாக்குதலுக்கு தகுந்த பதிலடி கொடுக்கப்படும்” என்று தலிபான் பகிரங்கமாக எச்சரித்துள்ளது. தலிபான்களின் இந்த மிரட்டல் பாகிஸ்தான் எல்லைப் பகுதியில் பெரும் பதற்றத்தை உருவாக்கியுள்ளதோடு, இரு நாடுகளுக்கும் இடையே போர் மூளும் சூழலை ஏற்படுத்தியுள்ளது.
இந்த மோதலுக்கு எல்லைப் பகுதிகளில் அதிகரித்து வரும் பயங்கரவாத நடவடிக்கைகளே முக்கிய காரணமாகக் கருதப்படுகிறது. பாகிஸ்தான் தனது நாட்டில் நடக்கும் தாக்குதல்களுக்கு தலிபான்களே காரணம் என்று குற்றம் சாட்டுகிறது, ஆனால் தலிபான்களோ பாகிஸ்தானின் அத்துமீறல்களை ஒருபோதும் பொறுத்துக்கொள்ள முடியாது என்று திட்டவட்டமாகத் தெரிவித்துள்ளனர்.
இந்நிலையில் “நாங்கள் அமைதியை விரும்பினோம், ஆனால் எங்கள் பொறுமையை பலவீனம் என்று நினைக்க வேண்டாம்” என தலிபான் செய்தித் தொடர்பாளர்கள் கூறியுள்ளனர். இந்த மோதல் போக்கு தெற்காசிய பிராந்தியத்தில் பெரும் அரசியல் மாற்றங்களையும், பாதுகாப்பற்ற சூழலையும் உருவாக்கும் என்று அஞ்சப்படுகிறது.
