தமிழகத்தின் கொங்கு மண்டலத்தில் தேர்தல் களம் தற்போது அனல் பறக்கத் தொடங்கியுள்ளது. திமுக சார்பில் செந்தில் பாலாஜியும், அதிமுக சார்பில் எஸ்.பி.வேலுமணியும் தலா 30 தொகுதிகளைக் கைப்பற்ற மும்முரமாகக் களமிறங்கியுள்ளனர்.

நீலகிரி, கோவை, திருப்பூர் மற்றும் ஈரோடு ஆகிய மாவட்டங்களில் நடத்தப்பட்ட பல்வேறு ரகசிய ஆய்வு முடிவுகள்  இரு தரப்பிற்குமே பெரும் அதிர்ச்சியைத் தந்துள்ளன. கடந்த ஐந்து ஆண்டுகால திட்டங்கள் திமுகவிற்கு எதிர்பார்த்த எழுச்சியைத் தரவில்லை என்றும், அதே சமயம் அதிமுகவிற்கு பழைய செல்வாக்கு அங்கு இல்லை என்றும் அந்த ஆய்வுகள் கூறுவதால் இரு கட்சிகளுமே கலக்கத்தில் உள்ளன.

இந்தச் சூழலைச் சமாளிக்க இரு தரப்பினரும் வாக்காளர்களையும் நிர்வாகிகளையும் கவரப் போட்டிப் போட்டுக் கொண்டு அன்பளிப்புகளை வாரி வழங்குகின்றனர். அதிமுக சார்பில் வேட்டி, சேலை மற்றும் பெரிய குடைகள் அடங்கிய தொகுப்பு வழங்கப்பட, அதற்குப் போட்டியாக திமுக தரப்பில் அண்டா மற்றும் வெள்ளி கொலுசுகள் விநியோகிக்கப்படுகின்றன.

குறிப்பாக, கோவை தெற்கு போன்ற பகுதிகளில் நடிகர் விஜய்யின் தமிழக வெற்றிக் கழகம் (தவெக) அசுர வளர்ச்சி அடைந்து, ஆய்வு முடிவுகளில் முதல் அல்லது இரண்டாம் இடத்தைப் பிடித்திருப்பது திமுக மற்றும் அதிமுக ஆகிய இரு கட்சிகளையுமே ஆச்சரியத்தில் ஆழ்த்தியுள்ளது.

வாக்குகளைத் தக்கவைக்க ஒருபுறம் ஸ்மார்ட் வாட்ச் போன்ற நவீனப் பரிசுகளை வழங்கினாலும், மறுபுறம் சமூக வலைதளங்களில் ஒருவரை ஒருவர் கடுமையாக விமர்சித்து வீடியோக்களை வெளியிட்டு வருகின்றனர். திமுக இளைஞர் அணி மாநாடுகள் மற்றும் தெருமுனைப் பிரச்சாரங்கள் மூலம் செந்தில் பாலாஜி வேகம் காட்டுகிறார்.

அதேவேளையில், அதிமுக நிர்வாகிகளின் வீடுகளுக்கே நேரடியாகச் சென்று எஸ்.பி.வேலுமணி ஆலோசனைகளை நடத்தி வருகிறார். இதனால் கொங்கு மண்டல அரசியல் களம் தற்போது மிகுந்த உஷ்ணத்துடன் காணப்படுகிறது.