மதுரையிலிருந்து ஏர் ஆம்புலன்ஸ் மூலம் கொண்டு வரப்பட்ட தானம் செய்யப்பட்ட இதயம் மற்றும் நுரையீரலை, சென்னை மெட்ரோ ரயில் நிறுவனம் மிக விரைவாக மருத்துவமனைக்குக் கொண்டு சேர்த்து ஒரு உயிரைக் காக்க உதவியுள்ளது.

நேற்று (27.02.2026) மீனம்பாக்கம் மெட்ரோ நிலையத்திலிருந்து ஏஜி-டிஎம்எஸ் நிலையம் வரை இந்த உடல் உறுப்புகள் கொண்டு செல்லப்பட்டன. இதற்காகச் சிறப்பு மெட்ரோ ரயில் ஏற்பாடு செய்யப்பட்டு, இடையில் எந்த நிலையங்களிலும் நிற்காமல் 7 நிலையங்களை வெறும் 9 நிமிடங்களில் கடந்து இலக்கை அடைந்தது.

மத்திய அரசின் புதிய விதிகளின்படி வழங்கப்பட்ட இந்தச் சேவையின் மூலம், ஏஜி-டிஎம்எஸ் நிலையத்திலிருந்து ஆம்புலன்ஸ் வழியாக கிரீம்ஸ் சாலையில் உள்ள அப்பல்லோ மருத்துவமனைக்கு உறுப்புகள் பாதுகாப்பாகக் கொண்டு செல்லப்பட்டன. அங்கு நோயாளிக்கு மாற்று அறுவை சிகிச்சை செய்யத் திட்டமிடப்பட்டுள்ளது.

போக்குவரத்து நெரிசல் மிகுந்த சென்னையில், மெட்ரோ ரயிலின் இந்தத் துரித நடவடிக்கை அவசர மருத்துவத் தேவைகளுக்குப் பேருதவியாக அமைந்ததோடு, பொதுச் சேவையில் மெட்ரோவின் அர்ப்பணிப்பையும் பறைசாற்றியுள்ளது.