உத்தரபிரதேச மாநிலம் சுல்தான்பூர் மாவட்டம் லம்புவா பகுதியில், 13 ஆண்டுகால காதல் திருமண வாழ்க்கை ஒரு கொடூரமான கொலையில் முடிந்துள்ளது. மூன்று குழந்தைகளின் தாயான ஷில்பி சிங் என்பவருக்கும், லாரி டிரைவரான தீபக் சிங் என்பவருக்கும் இடையே ஏற்பட்ட கள்ளக்காதலே இந்த விபரீதத்திற்கு காரணமாக அமைந்தது.

தனது மனைவிக்கும் நண்பனுக்கும் இடையிலான தொடர்பை கணவர் அமித் சிங் கண்டித்ததால், அவர்களுக்கிடையே அடிக்கடி தகராறு ஏற்பட்டு வந்தது. இந்த பகையால் ஆத்திரமடைந்த ஷில்பி, தனது கணவரைத் தீர்த்துக்கட்ட முடிவு செய்து தனது காதலனுடன் இணைந்து ஒரு நள்ளிரவில் திட்டமிட்டார்.

சம்பவம் நடந்த அன்று இரவு, அமித் தனது அறையில் அயர்ந்து தூங்கிக் கொண்டிருந்தபோது, ஷில்பி தனது காதலன் தீபக்கை வீட்டிற்குள் வரவழைத்தார். இருவரும் சேர்ந்து கூர்மையான ஆயுதங்களால் அமித்தை சரமாரியாகத் தாக்கியதில், அவர் சம்பவ இடத்திலேயே ரத்த வெள்ளத்தில் துடிதுடித்து உயிரிழந்தார்.

தகவல் அறிந்து வந்த போலீசார் நடத்திய விசாரணையில் ஷில்பி சிக்கினார். தற்போது அவர் கைது செய்யப்பட்டுள்ள நிலையில், தலைமறைவாக உள்ள காதலன் தீபக் சிங்கை போலீசார் தீவிரமாகத் தேடி வருகின்றனர். அன்புடன் தொடங்கிய இல்லற வாழ்க்கை, துரோகத்தால் ஒரு கொலைக்களமாக மாறியது அப்பகுதியில் பெரும் அதிர்ச்சியை ஏற்படுத்தியுள்ளது.