மகாராஷ்டிர மாநிலம் பிட் மாவட்டம் கைஜ் பகுதியில் உள்ள கரும்பு தோட்டத்தில் வேலை செய்து வரும் தொழிலாளியின் 13 வயது மகள், அதே கிராமத்தைச் சேர்ந்த சுராஜ் ஹரத் என்ற இளைஞரால் பாலியல் வன்கொடுமைக்கு உள்ளாக்கப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

கடந்த மாதம் 14 ஆம் தேதி மற்றும் இந்த மாதம் 8 ஆம் தேதி என இரண்டு முறை அந்தச் சிறுமியைச் சுராஜ் கட்டாயப்படுத்தி பாலியல் துன்புறுத்தல் செய்துள்ளார். மேலும் இது குறித்து யாரிடமாவது கூறினால் கொலை செய்து விடுவதாகச் சிறுமியை அந்த இளைஞர் மிரட்டியுள்ளார். இதனால் அச்சமடைந்த சிறுமி யாரிடமும் கூறாமல் இருந்துள்ளார்.

இந்நிலையில் தனக்கு நேர்ந்த கொடுமை குறித்துப் பாதிக்கப்பட்ட சிறுமி நேற்று தனது பெற்றோரிடம் அழுது கொண்டே தெரிவித்துள்ளார். இதைக் கேட்டு அதிர்ச்சியடைந்த பெற்றோர் உடனடியாக அருகில் உள்ள காவல் நிலையத்தில் புகார் அளித்தனர். புகாரின் அடிப்படையில் வழக்குப் பதிவு செய்த போலீசார், தலைமறைவாக இருந்த சுராஜைத் தேடிப் பிடித்துக் கைது செய்தனர்.

கைதான அந்த இளைஞர் மீது போக்சோ உள்ளிட்ட பல்வேறு சட்டப் பிரிவுகளின் கீழ் வழக்குப் பதிவு செய்யப்பட்டு அவர் சிறையில் அடைக்கப்பட்டார். இந்தச் சம்பவம் தொடர்பாக போலீசார் தொடர்ந்து தீவிர விசாரணை நடத்தி வருகின்றனர்.