உலகின் மிக உயர்ந்த சிகரமான எவரெஸ்ட், வீரத்திற்கும் சாகசத்திற்கும் அடையாளமாகப் போற்றப்பட்டாலும், இன்று அது மனிதர்களின் பொறுப்பற்ற செயலால் ஒரு பெரும் குப்பைக் கிடங்காக மாறி வருவது வேதனையளிப்பதாக உள்ளது. சமீபத்தில் சமூக வலைதளங்களில் வைரலாகி வரும் வீடியோ ஒன்று, எவரெஸ்ட் மலையின் பேஸ் கேம்ப் மற்றும் அதனைச் சுற்றியுள்ள பகுதிகளில் பிளாஸ்டிக் பாட்டில்கள், உணவுப் பொட்டலங்கள், காலியான ஆக்சிஜன் சிலிண்டர்கள் மற்றும் கிழிந்த கூடாரங்கள் சிதறிக் கிடப்பதைக் காட்டுகிறது.

ஆண்டுதோறும் ஆயிரக்கணக்கான மலையேற்ற வீரர்கள் இங்கு வரும் நிலையில், அவர்கள் விட்டுச் செல்லும் கழிவுகள் பனிக்கு அடியில் புதைந்து, பனி உருகும்போது மீண்டும் வெளியே வந்து அந்த இடத்தின் புனிதத்தையே கெடுக்கின்றன. இந்த அவல நிலை குறித்து இந்திய வனத்துறை அதிகாரி பர்வீன் கஸ்வான் உள்ளிட்ட பலரும் தங்களது ஆதங்கத்தை வெளிப்படுத்தியுள்ளனர்.

நிபுணர்களின் கூற்றுப்படி, கட்டுப்பாடற்ற சுற்றுலா மற்றும் அனுபவமற்ற வீரர்களுக்கு எளிதாக வழங்கப்படும் அனுமதியே இந்த நிலைமைக்கு முக்கியக் காரணமாகும். மலையேற்றத்தின் போது தங்கள் உயிரைக் காத்துக் கொள்ள சில சமயங்களில் பொருட்களை விட்டுச் சென்றாலும், பலரும் பொறுப்பின்றி கழிவுகளை அங்கேயே வீசிச் செல்வதை வழக்கமாகக் கொண்டுள்ளனர்.

நேபாள அரசு கடந்த காலங்களில் டன் கணக்கில் குப்பைகளை அகற்றும் பணிகளை மேற்கொண்ட போதிலும், புதிய குப்பைகள் சேருவது குறைந்தபாடில்லை. ஒரு லிட்டர் பாட்டில் முதல் மனிதக் கழிவுகள் வரை அனைத்தும் அங்குள்ள நீர்நிலைகளை மாசுபடுத்துவதாகச் சுற்றுச்சூழல் ஆர்வலர்கள் எச்சரிக்கின்றனர். “இயற்கையை வெல்வது என்பது அதனைச் சிதைப்பது அல்ல” என்பதை மலையேற்ற வீரர்கள் உணர வேண்டும் என்றும், கடுமையான சட்டங்கள் மற்றும் விழிப்புணர்வு மூலமே எவரெஸ்டின் அழகை மீட்க முடியும் என்றும் சமூக வலைதளங்களில் கோரிக்கைகள் எழுந்துள்ளன.