கன்னியாகுமரி மாவட்டம் குலசேகரம் அருகேயுள்ள கூடைத்தூக்கி நாகப்பள்ளிவிளை பகுதியைச் சேர்ந்த ரமணி (41) என்பவர், கணவர் மறைந்ததுக்குப் பின் குடும்பச் சுமைகளை சுமந்து, 15 வயது  பெண் குழந்தையை வளர்த்து வரும் தாயார் ஆவார். பி.எஸ்.சி., பி.எட். பட்டதாரியான இவர், வீட்டின் அருகே பேன்சி கடை ஒன்றை நடத்தி வந்தார். இந்நிலையில், கடந்த திங்கட்கிழமை காலை, ரமணி வீட்டில் விஷம் குடித்து தற்கொலை செய்து கொண்டார். தகவல் அறிந்த குலசேகரம் போலீசார் உடலை கைப்பற்றி, பிரேத பரிசோதனைக்காக ஆசாரிபள்ளம் அரசு மருத்துவமனைக்கு அனுப்பினர்.

பிரேத பரிசோதனைக்கு முந்தைய விசாரணையின் போது, ரமணி எழுதி வைத்திருந்த 6 பக்க உருக்கமான கடிதம் போலீசாருக்கு கிடைத்தது. அதில், அவரது தற்கொலைக்கு காரணமாகக் கூறப்பட்டுள்ள விபரங்கள், இழப்பும் வஞ்சகமும் நிரம்பியவை. அதில் “கணவர் இறந்தபின், அரசு வேலை கோரி மாவட்ட கலெக்டர் அலுவலத்தில் மனு அளித்தேன். அப்போது, அங்கு வருவாய் ஆய்வாளராக பணிபுரியும், வெள்ளிச்சந்தை புதுமடத்தைச் சேர்ந்த வேல்முருகன் (37), எனது கைப்பேசி எண்ணை எடுத்து, தொடர்ந்து தொடர்பு கொண்டு வந்தார்.

ஒரு கட்டத்தில், ‘நான் விவாகரத்து வழக்கில் இருக்கிறேன், அது முடிந்ததும் உன்னை திருமணம் செய்கிறேன்’ என ஆசை வார்த்தைகளை கூறி நம்பச்செய்தார். அவரிடம் நம்பிக்கையுடன் நகையும் பணமும் கொடுத்தேன். ஆனால், கடந்த மே மாதம் வேறொரு பெண்ணை திருமணம் செய்துகொண்டார். இதைக் கேட்டதும், அவர் மற்றும் அவரது உறவினர்கள் என்னிடம் தவறான வார்த்தைகள் பேசி, கொலை மிரட்டல் விடுத்தனர். இந்த மனவேதனைதான் தற்கொலைக்கு காரணம்” என கூறியிருந்தார்.

இதுகுறித்து, ரமணியின் தந்தை ஜார்ஜ், குலசேகரம் போலீசில் புகார் அளித்தார். அதில், ரமணியின் மரணத்திற்கு வேல்முருகனும், அவரது உறவினர்கள் இருவரும் நேரடியாக காரணம் எனக் கூறியிருந்தார். அதன்பேரில், குலசேகரம் சப்-இன்ஸ்பெக்டர் சரவணகுமார், மூவர் மீதும் வழக்குப்பதிவு செய்தார். இதில், வேல்முருகன் தலைமறைவாக இருந்த நிலையில், போலீசார் அவரை திங்கட்கிழமை இரவு கைது செய்து, விசாரணை மேற்கொண்டனர். விசாரணையில், ரமணியுடன் பழகியதை அவர் ஒப்புக் கொண்டதாக கூறப்படுகிறது.

இதைதொடர்ந்து, அவரை கைது செய்த போலீசார், நேற்று மாலை நாகர்கோவிலில் உள்ள நீதிமன்றத்தில் ஆஜர் படுத்தினர். இந்நிலையில், ரமணி எழுதியதாகக் கூறப்படும் 6 பக்க கடிதத்தில் உள்ள எழுத்துகள், விவரங்கள் குறித்து சில சந்தேகங்கள் எழுந்துள்ளதால், அந்தக் கடிதம் தடயவியல் ஆய்விற்காக அனுப்பப்படும் என போலீசார் தெரிவித்தனர்.

மேலும் வேல்முருகனை கைது செய்யாவிட்டால், ரமணியின் உடலை பெற்றுக்கொள்ள மாட்டோம் என உறவினர்கள் தெரிவித்ததால், அவரது உடல் சில நேரம் பிரேத பரிசோதனைக்கு ஆளாகாமல் வைத்திருந்ததாகத் தகவல். பின்னர், நேற்று பிற்பகலில் ஆசாரிபள்ளம் மருத்துவக் கல்லூரியில் பிரேத பரிசோதனை செய்யப்பட்டு, உடல் உறவினர்களிடம் ஒப்படைக்கப்பட்டது.