ஓடிஷா மாநிலத்தின் பூரி மாவட்டம் நிமபாடா தெஹ்ஸிலில் உள்ள பயாபர் பகுதியில், 15 வயது பிளஸ்-2 மாணவி ஒருவர் அடையாளம் தெரியாத மூன்று இளைஞர்களால் தீ வைத்து எரிக்கப்பட்ட சம்பவம் பெரும் அதிர்ச்சியையும் கோபத்தையும் ஏற்படுத்தியுள்ளது.

இன்று  காலை 8:30 மணியளவில், அந்த சிறுமி தனது தோழியிடம் புத்தகங்களை வழங்க சென்று கொண்டிருந்தபோது இந்த கொடூரமான சம்பவம் நடந்தது. பார்கவி நதி சாலையில் உள்ள வெறிச்சோடிய பகுதியில், மூன்று இளைஞர்கள் சிறுமியை கடத்திச் சென்று, தூக்கி வைத்து தீ மூட்டியதாகக் கூறப்படுகிறது.

இந்த கொடூர தாக்குதலில் சிறுமியின் கைகள், கால்கள் மற்றும் உடலின் பல பகுதிகள் தீக்காயங்களால் மோசமாக சேதமடைந்துள்ளன. சம்பவத்தின் போது மாணவியின்  அலறல் சத்தத்தை கேட்டுள்ள மக்கள் விரைந்து சென்று தீயை அணைத்து, முதலில் பிபிலி CHC மருத்துவமனைக்கு, பின்னர் புவனேஸ்வர் கேபிடல் மருத்துவமனைக்கு கொண்டு சென்றனர்.

தற்போது சிறுமி புவனேஸ்வர் எய்ம்ஸ் மருத்துவமனையில் தீவிர சிகிச்சையில் உள்ளார். இவ்வளவு மோசமான தாக்குதல் நடந்தாலும் இதுவரை ஒருவரும் கைது செய்யப்படவில்லை. இந்த சம்பவம்  பலங்கா காவல் நிலையத்திலிருந்து வெறும் 1.5 கி.மீ தூரத்தில் நடந்தது.

இதுகுறித்து சிறுமியின் குடும்பத்தினர் கூறியதாவது, சிறுமிக்கு எவருடனும் எந்தவிதமான தனிப்பட்ட தகராறுகளும் இல்லை. இது காதல் பழிவாங்கும் குற்றம் அல்ல என தெரிவித்துள்ளனர். இது போன்ற கொடூரமான தாக்குதல்கள் தொடர்கின்ற சூழ்நிலையில், சிறுமியின் பாதுகாப்பு குறித்த கேள்விகள் எழுந்து வருகின்றன.

இந்தச் சம்பவம் தொடர்பாக, ஓடிஷா துணை முதல்வர் பரவதி பரிதா கடும் கண்டனமும் தெரிவித்து,  நடவடிக்கையும் எடுத்துள்ளார். குற்றவாளிகளை உடனடியாக கைது செய்ய சட்ட அமலாக்க அதிகாரிகளுக்கு உத்தரவிடப்பட்டுள்ளதாகவும், பாதிக்கப்பட்ட சிறுமியின் சிகிச்சை செலவினங்களை மாநில அரசு முழுமையாக ஏற்கும் என்றும் அவர் அறிவித்துள்ளார்.

மேலும், குற்றம் நடந்த இடத்தில் சில முக்கிய உடல் ரீதியான ஆதாரங்கள் கிடைத்துள்ளதாக பூரி மாவட்ட எஸ்பி பினாக் மிஸ்ரா தெரிவித்தார். தடயவியல் ஆய்வுக்குப் பிறகு மேலும் தகவல்கள் வெளியாகும் எனவும் போலீசார் கூறியுள்ளனர்.