ஹோர்முஸ் நீரிணை விவகாரத்தில் அமெரிக்க அதிபர் டொனால்ட் டிரம்ப் எடுத்துள்ள அதிரடி முடிவு உலக நாடுகளிடையே பெரும் பதற்றத்தை ஏற்படுத்தியுள்ளது. அமெரிக்காவிற்கு இந்த வழித்தடம் இனி தேவையில்லை என்றும், எண்ணெய் தேவைப்படும் நாடுகள் தங்கள் சொந்தப் பாதுகாப்பிற்குப் பொறுப்பேற்க வேண்டும் என்றும் கூறி டிரம்ப் பின்வாங்கியுள்ளார்.

அதேவேளையில், ஹோர்முஸைத் திறக்க உதவாவிட்டால் உக்ரைனுக்கான ஆயுத உதவியை நிறுத்துவேன் என்று நேட்டோ நாடுகளை அவர் மிரட்டியுள்ளார். இதற்குப் பதில் அளித்துள்ள பிரான்ஸ், நேட்டோ என்பது ஐரோப்பிய பாதுகாப்பிற்கானது மட்டுமே என்றும், ஹோர்முஸில் ராணுவ நடவடிக்கை எடுப்பது சர்வதேச சட்டத்திற்கு எதிரானது என்றும் திட்டவட்டமாகக் கூறியுள்ளது.

மறுபுறம், ஹோர்முஸ் நீரிணை தங்கள் முழு கட்டுப்பாட்டில் இருப்பதாக ஈரான் அறிவித்துள்ள நிலையில், அங்கிருந்து வரும் எண்ணெயை 90% நம்பியிருக்கும் சீனாவிற்குப் பெரும் அச்சுறுத்தல் ஏற்பட்டுள்ளது. இந்தப் பதற்றமான சூழலில், இஸ்ரேலிய எண்ணெய் கப்பலான ‘அக்வா-1’ ஈரானிய ஏவுகணைத் தாக்குதலில் எரிந்து சாம்பலாகியுள்ளது.

400-க்கும் மேற்பட்ட எண்ணெய் கப்பல்கள் கடலில் தவித்து வருவதால் உலகப் பொருளாதாரம் பெரும் பாதிப்பைச் சந்திக்கும் அபாயம் ஏற்பட்டுள்ளது. சீனா இந்த நெருக்கடிக்கு அமெரிக்காவும் இஸ்ரேலுமே காரணம் என்று குற்றம் சாட்டியுள்ள நிலையில், ஹோர்முஸ் விவகாரம் ஒரு உலகளாவிய மோதலாக உருவெடுத்துள்ளது.