மத்திய அரசின் போட்டித் தேர்வு முறைகேடுகளைக் கண்டித்து, லடாக் செயல்பாட்டாளர் சோனம் வாங்சுக் டெல்லியில் கடந்த 20 நாட்களாகத் தொடர் உண்ணாவிரதத்தில் ஈடுபட்டு வந்த நிலையில், காவல்துறை அவரை வலுக்கட்டாயமாகத் தூக்கிச் சென்றது பெரும் பரபரப்பை ஏற்படுத்தியுள்ளது.

உடல்நலம் மிகவும் மோசமடைந்த நிலையிலும், மத்திய அரசு மௌனம் காப்பது விமர்சனங்களுக்கு உள்ளாகியுள்ளது. இந்தச் சூழலில், கடந்த 1984-ம் ஆண்டு சோனம் வாங்சுக்கின் தந்தை சோனம் வாங்யால், லடாக் மக்களின் உரிமைகளுக்காக நடத்திய வரலாற்றுச் சிறப்புமிக்க உண்ணாவிரதப் போராட்டம் தற்போது அனைவரின் கவனத்தையும் ஈர்த்துள்ளது.

சோனம் வாங்யால் என்பவர் இளம் வயதிலேயே எவரெஸ்ட் சிகரத்தை அடைந்து உலக சாதனை படைத்தவர் மட்டுமல்லாமல், லடாக்கின் முக்கிய அரசியல் தலைவராகவும் திகழ்ந்தவர். 1984-ம் ஆண்டு லடாக் மக்களுக்குப் பழங்குடியின அந்தஸ்து கோரி அவர் 5 நாட்கள் உண்ணாவிரதம் இருந்தபோது, அப்போதைய பிரதமர் இந்திரா காந்தி நேரடியாக லே பகுதிக்குச் சென்று அவரிடம் பேச்சுவார்த்தை நடத்தினார்.

மக்களின் கோரிக்கையை ஏற்று பழங்குடியின அந்தஸ்து வழங்கப்படும் என இந்திரா காந்தி அளித்த வாக்குறுதியின்படி, 1989-ம் ஆண்டு சட்டபூர்வமாக 8 சமூகங்களுக்குப் பழங்குடியின அந்தஸ்து கிடைத்து லடாக் வரலாற்றில் மிகப்பெரிய அரசியல் வெற்றி பெறப்பட்டது.

ஆனால், தற்போதைய சூழல் முற்றிலும் மாறாக உள்ளது; 2019-ல் யூனியன் பிரதேசங்களாகப் பிரிக்கப்பட்ட ஜம்மு காஷ்மீர் மற்றும் லடாக் பகுதிகள் இன்று தங்கள் மாநில அந்தஸ்து மற்றும் 6-வது அட்டவணை சேர்க்கைக்காகத் தொடர்ந்து போராடி வருகின்றன. சோனம் வாங்சுக் கடந்த ஆண்டு மேற்கொண்ட 35 நாள் உண்ணாவிரதத்திற்காகச் சிறையில் அடைக்கப்பட்டதும், தற்போது கல்வித்துறை முறைகேடுகளுக்காக அவர் மீண்டும் போராடுவதையும் பார்க்கும் போது, மத்திய அரசின் அணுகுமுறை ஜனநாயக முறைப்படி அமைவதில்லை என சமூக ஆர்வலர்கள் கருதுகின்றனர். முந்தைய காலங்களைப் போல மக்கள் பிரதிநிதிகள் மக்களுடன் நேரடியாகப் பேசித் தீர்வு காணும் அரசியல் மரபு தற்போது கைவிடப்பட்டதோ என்ற கேள்வி எழுகிறது.