முன்னாள் முதல்வர் ஓ.பன்னீர்செல்வத்தின் தீவிர ஆதரவாளரான எம்.எல்.ஏ ஐயப்பன், நடிகர் விஜய்யின் தமிழக வெற்றிக் கழகத்தில் (தவெக) இணையப்போவதாக சமூக வலைதளங்களில் ஒரு தகவல் காட்டுத்தீயாகப் பரவியது. அவர் பனையூரில் உள்ள தவெக அலுவலகத்திற்குச் சென்று பேச்சுவார்த்தை நடத்தியதாகவும் கூறப்பட்டது. ஆனால், இந்தத் தகவலை ஐயப்பன் முற்றிலும் மறுத்துள்ளார். தான் தவெக-வில் இணையப்போவதாக வெளியான செய்திகள் அனைத்தும் வெறும் வதந்திகளே என்று அவர் திட்டவட்டமாகத் தெரிவித்துள்ளார்.
தற்போது தான் மதுரையில் இருப்பதாகவும், பனையூர் அலுவலகத்திற்குச் சென்றதாகக் கூறப்படுவது தவறான தகவல் என்றும் அவர் விளக்கம் அளித்துள்ளார். மேலும், “நான் கடைசி வரை ஓ.பி.எஸ் உடனே இருப்பேன்” என்று கூறி, தனது அரசியல் விசுவாசத்தை மீண்டும் உறுதிப்படுத்தியுள்ளார். அரசியல் மாற்றங்கள் குறித்த யூகங்களுக்கு முற்றுப்புள்ளி வைக்கும் வகையில் அவரது இந்தப் பதில் அமைந்துள்ளது.
