தமிழகத்தில் முதியோர் மற்றும் மாற்றுத்திறனாளிகளுக்காகச் செயல்படுத்தப்பட்டு வரும் ‘தாயுமானவர்’ திட்டத்தின் கீழ், 2026-ஆம் ஆண்டு ஜனவரி மாதத்திற்கான ரேஷன் பொருட்கள் விநியோகிக்கப்படும் தேதியைத் தமிழக அரசு அறிவித்துள்ளது. இந்தத் திட்டத்தின் மூலம் 65 வயதிற்கு மேற்பட்ட மூத்த குடிமக்கள் மற்றும் மாற்றுத்திறனாளிகளின் இல்லத்திற்கே நேரடியாகச் சென்று அத்தியாவசியப் பொருட்கள் வழங்கப்பட்டு வருகின்றன.

அந்த வகையில், வரும் ஜனவரி 4 மற்றும் 5 ஆகிய தேதிகளில் பயனாளிகளின் வீடுகளுக்கே சென்று ரேஷன் பொருட்கள் விநியோகம் செய்யப்படும் எனத் தெரிவிக்கப்பட்டுள்ளது. சென்னையில் உள்ள அண்ணாநகர், அடையாறு, அம்பத்தூர், ராயபுரம் உள்ளிட்ட 15 மண்டலங்களில் கூட்டுறவுத் துறையின் கீழ் இயங்கும் 990 நியாயவிலைக் கடைகளின் விற்பனையாளர்கள் இந்தப் பணிகளை மேற்கொள்ள உள்ளனர்.

அரிசி, சர்க்கரை, பருப்பு மற்றும் பாமாயில் போன்ற பொருட்களை நீண்ட வரிசையில் நின்று வாங்க முடியாத சூழலில் உள்ள 21 லட்சத்திற்கும் மேற்பட்ட பயனாளிகள் இந்தச் சேவையைப் பயன்படுத்தி வருகின்றனர். தகுதியுள்ள பயனாளிகள் அனைவரும் தங்களது இல்லத்திலேயே இருந்து இந்தப் பொருட்களைப் பெற்றுக்கொள்ளுமாறு தமிழக அரசு அறிவுறுத்தியுள்ளது.