உணவகம் ஒன்றில் தனது குடும்பத்தினருடன் இரவு உணவு அருந்திக்கொண்டிருந்த இந்திய ஆண் ஒருவரிடம், பெண் ஒருவர் திடீரென வந்து இனவெறி தூண்டும் வகையில் பேசிய சம்பவம் பெரும் பரபரப்பை ஏற்படுத்தியுள்ளது. வெளிப்படையான எந்தவித காரணமும் இன்றி அந்த மேஜைக்கு வந்த அந்தப் பெண், “ஒரு இந்திய ஆணாக இருந்தும் நீங்கள் நல்ல நறுமணத்துடன் இருக்கிறீர்கள், உங்களிடம் கறி வாசனை வரவில்லை” என்று கூறியது அங்கிருந்தவர்களை அதிர்ச்சியடைய வைத்தது.
இனவெறி கலந்த அந்தப் பெண்ணின் பேச்சை அந்த இந்தியர் மிகவும் அமைதியாகவும் நிதானமாகவும் எதிர்கொண்டார். “நீங்கள் சொல்வது ஒரு பாராட்டைப் போல எனக்குத் தெரியவில்லை” என்று நேரடியாகவே கூறிய அவர், “மற்றவர்களிடம் பேசும்போது வார்த்தைகளை எப்படிப் பயன்படுத்த வேண்டும் என்பதைத் தெரிந்துகொண்டு திருத்திக்கொள்ளுங்கள்” என்று அந்தப் பெண்ணுக்குப் பொறுமையாகவும் சுடச்சுடவும் அறிவுரை வழங்கினார்.
இந்தியரின் இந்த எதிர்பாராத நிதானமான பதிலைக் கேட்டு முற்றிலும் திகைத்துப்போன அந்தப் பெண், மேற்கொண்டு எதுவும் பேச முடியாமல் அங்கிருந்து விரைவாக நகர்ந்து சென்றார். உணவகத்தில் நடந்த இந்த முழுச் சம்பவமும் வீடியோவாகப் பதிவாகி, தற்போது சமூக வலைதளங்களில் பரவி வைரலாகி வருகிறது.
இந்தியர்களைப் பற்றி ‘கறி வாசனை அடிக்கும்’ என்று பொதுமைப்படுத்திப் பேசுவது நீண்டகாலமாக அவர்களைக் கேலி செய்யவும் ஒதுக்கவும் பயன்படுத்தப்படும் ஒரு மறைமுக இனவெறி வார்த்தையாகும். பாராட்டுவது போலப் பேசி உள்நோக்கத்துடன் காயப்படுத்தும் இதுபோன்ற நுட்பமான இனவெறிப் பேச்சுகளைப் பற்றி இந்தச் சம்பவம் ஒரு பெரிய விவாதத்தை இணையத்தில் உருவாக்கியுள்ளது.
கோபப்பட்டுச் சண்டையிடாமல், மிகவும் நிதானமாகவும் ஆணித்தனமாகவும் அந்தப் பெண்ணின் தவறான எண்ணத்தைச் சுட்டிக்காட்டிய அந்த இந்திய ஆணின் திறமையான பதிலடிக்கு இணையதளவாசிகளும் பொதுமக்களும் பாராட்டுகளைக் குவித்து வருகின்றனர்.
