இந்தியாவைச் சேர்ந்த 55 வயதான குர்மீத் சிங்கின் அமெரிக்க குடியுரிமையை அந்நாட்டு நீதிமன்றம் ரத்து செய்துள்ளது. 2011-ஆம் ஆண்டு நியூயார்க்கில் பெண் ஒருவரை கடத்தி பாலியல் வன்கொடுமை செய்த வழக்கில் அவர் குற்றவாளியாகத் தீர்ப்பளிக்கப்பட்டு 20 ஆண்டுகள் சிறைத் தண்டனை அனுபவித்து வருகிறார். குடியுரிமைக்காக விண்ணப்பித்தபோது தனது கடுமையான குற்றப் பின்னணியை அவர் மறைத்ததாக அமெரிக்க நீதித்துறை தெரிவித்துள்ளது. இதையடுத்து மேற்கொள்ளப்பட்ட சட்ட நடவடிக்கையின் முடிவில் அவரது இயற்கைமயமாக்கப்பட்ட குடியுரிமை ரத்து செய்யப்பட்டுள்ளது.

1992-ஆம் ஆண்டு தற்காலிக விசாவில் அமெரிக்காவுக்குச் சென்ற குர்மீத் சிங், அனுமதிக்கப்பட்ட காலத்தைக் கடந்தும் அங்கு தங்கியிருந்ததாக தெரிவிக்கப்பட்டுள்ளது. பின்னர் குடும்ப அடிப்படையிலான குடியேற்ற விசா மூலம் 2000-ஆம் ஆண்டு நிரந்தரக் குடியுரிமையைப் பெற்றார். 2011-ஆம் ஆண்டு குடியுரிமைக்கு விண்ணப்பிப்பதற்கு சில வாரங்களுக்கு முன்பு, வாடகை வாகன ஓட்டுநராகப் பணியாற்றிய அவர், வீட்டுக்குச் செல்ல வாகனத்தில் பயணம் செய்த பெண் பயணி ஒருவரை தனிமையான இடத்துக்கு அழைத்துச் சென்றதாக வழக்கு ஆவணங்களில் குறிப்பிடப்பட்டுள்ளது.

அந்தப் பெண் வாகனத்தில் தூங்கிக் கொண்டிருந்த நிலையில், குர்மீத் சிங் அவரை கத்தியைக் காட்டி மிரட்டியதாகவும், கட்டிப் போட்டு பாலியல் வன்கொடுமை செய்ததாகவும் நீதித்துறை ஆவணங்களில் கூறப்பட்டுள்ளது. பின்னர் அதிகாலை நேரத்தில் அந்தப் பெண் அங்கிருந்து தப்பி, சாலையில் சென்றவர்களிடம் உதவி கோரியதாக தெரிவிக்கப்பட்டுள்ளது. இந்தச் சம்பவம் தொடர்பான குற்றங்களை தனது குடியுரிமை விண்ணப்பத்தில் அவர் வெளிப்படுத்தவில்லை என அதிகாரிகள் தெரிவித்துள்ளனர். இதையடுத்து அவர் மீது வழக்குத் தொடரப்பட்டு, பாலியல் வன்கொடுமை மற்றும் கடத்தல் உள்ளிட்ட குற்றங்களில் குற்றவாளியாகத் தீர்ப்பளிக்கப்பட்டு 20 ஆண்டுகள் சிறைத் தண்டனை விதிக்கப்பட்டது.

குற்றச் செயல்களை மறைத்து பெறப்பட்ட குடியுரிமை சட்டப் பாதுகாப்பாக மாறாது என்று அமெரிக்க அட்டர்னி ஜெனரல் டாட் பிளாஞ்ச் தெரிவித்துள்ளார். மோசடி மூலம் பெறப்பட்ட குடியுரிமையைப் பயன்படுத்தி குற்றவாளிகள் சட்ட நடவடிக்கையிலிருந்து தப்ப முடியாது என்றும் அவர் கூறியுள்ளார். இதனிடையே, குர்மீத் சிங் தனது குற்றப் பின்னணியை மறைத்ததன் மூலம் குடியுரிமை பெறுவதற்கான தகுதியை தவறாகப் பயன்படுத்தியதாக அமெரிக்க நீதித்துறை தெரிவித்துள்ளது. நீதிமன்ற உத்தரவால் அவரது அமெரிக்க குடியுரிமை தற்போது அதிகாரப்பூர்வமாக ரத்து செய்யப்பட்டுள்ளது.