தமிழ்நாடு அரசு மாநகராட்சிகளில் தூய்மைப் பணிகளைத் தனியாரிடம் ஒப்படைக்க எடுக்கும் முடிவை விடுதலைச் சிறுத்தைகள் கட்சி வன்மையாகக் கண்டிக்கிறது. கடந்த காலங்களில் இத்தகைய முயற்சியை எதிர்த்த நிலையில், தற்போது மாநிலம் முழுவதும் இதை விரிவுபடுத்துவது தூய்மைப் பணியாளர்களின் வாழ்வாதாரத்தைப் பாதிக்கும் செயலாகும்.

அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் திட்டத்திற்காக 755 கோடி ரூபாய் ஒதுக்கீடு செய்வதையும் விசிக எதிர்க்கிறது. இந்தத் தொகையைத் தங்க மோதிரத்திற்குச் செலவு செய்வதற்குப் பதிலாக, அரசு மருத்துவமனைகளில் நவீன பிரசவ வார்டுகளை உருவாக்கி, கூடுதல் மருத்துவப் பணியாளர்களை நியமிப்பது ஏழை எளிய மக்களுக்குப் பயனுள்ளதாக அமையும். இத்திட்டத்தை அரசு மறுபரிசீலனை செய்ய வேண்டும் என்று கேட்டுக்கொள்கிறோம்.

மேலும், சட்டப்பேரவையில் முதலமைச்சர் அவர்கள் முன்னாள் முதலமைச்சரின் தோல்வியை ஏளனம் செய்து பேசியிருப்பது அந்தப் பதவிக்குரிய மாண்பைக் குறைப்பதாக அமைந்துள்ளது. இத்தகைய செயல்கள் சட்டப்பேரவை மரபுகளுக்கு உகந்தவை அல்ல, எனவே இனிவரும் காலங்களில் பதவியின் உயரிய மாண்பைப் பேணிப் பாதுகாக்க வேண்டும் என்று கேட்டுக்கொள்கிறோம்.

“>

 

அதேபோல், கோடிக்கணக்கான ரூபாயில் பேனா சிலை வைப்பது மற்றும் கார் பந்தயங்களுக்கு முக்கியத்துவம் அளிக்கும் அரசு, தூய்மைப் பணியாளர்களின் நலன் மற்றும் பொதுமக்களுக்கான அடிப்படை மருத்துவ வசதிகளை மேம்படுத்துவதில் அதிக கவனம் செலுத்த வேண்டும் என்பதை சுட்டிக்காட்டுகிறோம்.