சென்னையை அடுத்த துரைப்பாக்கத்தைச் சேர்ந்த வாலிபர் ஒருவர், இன்ஸ்டாகிராம் மூலம் பழகிய இளம்பெண்ணுக்குக் குளிர்பானத்தில் மயக்க மருந்து கலந்து கொடுத்து பாலியல் பலாத்காரம் செய்துள்ள அதிர்ச்சிச் சம்பவம் பெரும் பரபரப்பை ஏற்படுத்தியுள்ளது. சென்னை சூளை பகுதியைச் சேர்ந்த பாதிக்கப்பட்ட இளம்பெண், இதுகுறித்து காவல் துணை ஆணையரிடம் பரபரப்பு புகார் ஒன்றை அளித்துள்ளார். அந்தப் புகாரில், தனியார் நிறுவனத்தில் பணியாற்றியபோது தாம்பரத்தில் சாப்ட்வேர் என்ஜினீயராகவும், பகுதி நேர இயக்குநராகவும் இருக்கும் வாலிபருடன் இன்ஸ்டாகிராம் மூலம் நட்பு ஏற்பட்டு, அது காதலாக மாறியதாகக் குறிப்பிட்டுள்ளார். தன்னைத் திருமணம் செய்து கொள்வதாக நம்ப வைத்த அந்த வாலிபர், பதிவுத் திருமணம் பற்றிப் பேசுவதற்காகக் கடந்த ஆண்டு மார்ச் 31-ஆம் தேதி தனது நண்பரின் ஹோட்டலுக்கு வரவழைத்துள்ளார்.

அங்குச் சென்ற இளம்பெண்ணுக்குத் தெரியாமல் மயக்க மருந்து கலந்த தண்ணீரைக் கொடுத்துள்ளார். அதைக் குடித்ததும் மயக்கம் ஏற்பட்டு, ஏதோ விபரீதம் நடக்கப் போவதை உணர்ந்த இளம்பெண், தனது தந்தைக்குத் தகவல் தெரிவிக்க முயன்றபோது அவரது செல்போன் பிடுங்கப்பட்டுள்ளது. தான் மயக்கமடைவதற்கு முன்பு, அவரது தவறான செய்கையை உணர்ந்து அவரைத் தடுத்து தள்ள முயன்றதாகவும், ஆனால் மருந்து வீரியத்தால் தன்னால் முழுமையாகப் போராட முடியாமல் போனதாகவும், அந்த மயக்க நிலையிலேயே வாலிபர் தன்னை வலுக்கட்டாயமாகப் பாலியல் பலாத்காரம் செய்ததாகவும் இளம்பெண் வேதனையுடன் தெரிவித்துள்ளார். இந்தத் துயரச் சம்பவம் குறித்து வழக்குப் பதிவு செய்துள்ள போலீஸார், தலைமறைவாக உள்ள அந்த இன்ஸ்டாகிராம் காதலனைத் தீவிரமாகத் தேடி வருகின்றனர்.