பாகிஸ்தான் தொடர்ந்து பயங்கரவாதத்திற்கு அடைக்கலம் கொடுத்து, இந்தியாவிற்கு எதிராகச் செயல்பட்டு வந்தால், அது உலக வரைபடத்தில் ஒரு நாடாக நீடிக்க விரும்புகிறதா அல்லது வரலாற்றில் ஒரு பக்கமாக புதைக்கப்பட விரும்புகிறதா என்பதை அவர்கள்தான் முடிவு செய்ய வேண்டும் என்று இந்திய ராணுவத் தளபதி ஜெனரல் உபேந்திர திவேதி மிகக் கடுமையான எச்சரிக்கையை விடுத்துள்ளார்.

மேலும் டெல்லியில் உள்ள மானேக்ஷா மையத்தில் நடைபெற்ற ‘சேனா சம்வாத்’ கலந்துரையாடல் நிகழ்வின் போது, கடந்த ஆண்டு நடைபெற்ற ‘ஆபரேஷன் சிந்து’ போன்றதொரு சூழல் மீண்டும் ஏற்பட்டால் இந்திய ராணுவம் எவ்வாறு பதிலடி கொடுக்கும் என்று எழுப்பப்பட்ட கேள்விக்கு பதிலளிக்கும் போதே அவர் இந்த அதிரடியான கருத்தைப் பதிவு செய்தார். பயங்கரவாதத்திற்கு எதிராக இந்தியாவின் சகிப்புத்தன்மையற்ற கொள்கையை இந்த அறிக்கை மீண்டும் ஒருமுறை சர்வதேச அரங்கில் ஆணித்தரமாக உணர்த்தியுள்ளது.

இதனால் கடந்த ஆண்டு ஏப்ரல் மாதம் பஹல்காமில் நடந்த கொடூரமான பயங்கரவாதத் தாக்குதலுக்குப் பதிலடியாக, இந்தியப் படைகள் பாகிஸ்தான் மற்றும் ஆக்கிரமிப்பு காஷ்மீரில் உள்ள பயங்கரவாத முகாம்கள் மீது ‘ஆபரேஷன் சிந்து’ மூலம் துல்லியமான தாக்குதல்களை நடத்தின. இரு அணுஆயுத நாடுகளுக்கு இடையே சுமார் 88 மணி நேரம் நீடித்த இந்த ராணுவ மோதலின் முதலாம் ஆண்டு நினைவு தினம் சமீபத்தில் கடைப்பிடிக்கப்பட்ட நிலையில், ராணுவத் தளபதியின் இந்த எச்சரிக்கை வெளியாகி உள்ளது.

இந்நிலையில் சமீபகாலமாக இந்தியாவுடன் பேச்சுவார்த்தையைத் தொடங்க பாகிஸ்தான் விருப்பம் தெரிவித்து வரும் சூழலில், பயங்கரவாதமும் பேச்சுவார்த்தையும் ஒன்றாக பயணிக்க முடியாது என்ற இந்தியாவின் உறுதியான நிலைப்பாட்டை ஜெனரல் உபேந்திர திவேதியின் இந்த நேரடி எச்சரிக்கை மிகத் தெளிவாகப் பறைசாற்றுகிறது.