மேற்கு வங்க மாநில சட்டமன்றத் தேர்தலுக்கான இரண்டாம் கட்ட வாக்குப்பதிவு இன்று காலை 7 மணிக்குத் தொடங்கி விறுவிறுப்பாக நடைபெற்று வருகிறது. மொத்தம் உள்ள 142 தொகுதிகளில் நடைபெறும் இந்தத் தேர்தலில், சுமார் 1,448 வேட்பாளர்கள் களமிறங்கியுள்ளனர். 3.21 கோடிக்கும் அதிகமான வாக்காளர்கள் இன்று தங்கள் ஜனநாயகக் கடமையை ஆற்ற உள்ளனர். இதற்காக மாநிலம் முழுவதும் 41,001 வாக்குச்சாவடிகள் அமைக்கப்பட்டு, அசம்பாவிதங்கள் ஏதும் நடைபெறாமல் இருக்கப் பலத்த போலீஸ் பாதுகாப்பு போடப்பட்டுள்ளது.

​ஏற்கனவே நடைபெற்ற 152 தொகுதிகளுக்கான முதற்கட்ட வாக்குப்பதிவில் 93% என்ற வரலாற்றுச் சிறப்புமிக்க வாக்குப்பதிவு பதிவாகியிருந்தது குறிப்பிடத்தக்கது. அதே போன்ற ஒரு விறுவிறுப்பு இன்றைய இரண்டாம் கட்டத் தேர்தலிலும் காணப்படுகிறது. காலை முதலே மக்கள் நீண்ட வரிசையில் நின்று ஆர்வத்துடன் வாக்களித்து வருகின்றனர். மம்தா பானர்ஜியின் திரிணாமுல் காங்கிரஸ் மற்றும் பாஜக இடையே கடும் போட்டி நிலவும் சூழலில், இன்றைய தேர்தல் முடிவுகள் ஆட்சியமைப்பதில் மிக முக்கியப் பங்கு வகிக்கும் என்பதால் நாடு முழுவதும் இந்தத் தேர்தல் உற்றுநோக்கப்படுகிறது.