கிருஷ்ணகிரி மாவட்டம் ஒசூர் அடுத்த அஞ்செட்டி அருகேயுள்ள தொட்டமஞ்சி மலை கிராமத்தைச் சேர்ந்த மாதேஷ் (வயது 35), கூலி தொழிலாளராக பணியாற்றி வந்தார். அதே பகுதியைச் சேர்ந்த மாதப்பன் மனைவி நாகம்மா (வயது 34) ஆகிய இருவரும் கடந்த 15 நாட்களாக வீடு திரும்பாமல் காணாமல் போன நிலையில், குடும்பத்தினர் பல்வேறு இடங்களில் தேடி பார்த்தும் அவர்கள் எங்கு கிடைக்கவில்லை.

இதையடுத்து, அஞ்செட்டி காவல் நிலையத்தில் இருவரது குடும்பத்தினரும் புகார் அளித்தனர். போலீசார் வழக்கு பதிவு செய்து தீவிரமாக விசாரணை மேற்கொண்டனர். இந்த நிலையில், தொட்டமஞ்சி கிராமத்துக்கு அருகிலுள்ள வனப்பகுதியில் போலீசார் சோதனை நடத்தியபோது, முதலில் மாதேஷின் உடலை அழுகிய நிலையில் கண்டுபிடித்தனர். பின்னர் அதே வனப்பகுதியில் வேறு பகுதியில் நாகம்மாவின் உடலும் மீட்கப்பட்டது.

இருவரது உடல்களும் மீட்கப்பட்டு, பிரேத பரிசோதனைக்காக தேன்கனிக்கோட்டை அரசு மருத்துவமனைக்கு அனுப்பி வைக்கப்பட்டன. இது தொடர்பான விசாரணையில் வெளியான தகவல்களின்படி, மாதேஷுக்கும் நாகம்மாவுக்கும் தவறான கள்ள உறவு இருந்ததாகக் கூறப்படுகிறது. வனப்பகுதியில் இருவரும் தனியாக உள்ளதை பார்த்த நாகம்மாவின் கணவர் மாதப்பன், தன் மனைவியிடம் கடுமையாக கண்டித்ததாகவும், பின்னர் தனது தாய் வீட்டிற்கு சென்றுவிட்டதாகவும் தகவல் வெளியாகியுள்ளது.

மாதேஷும், நாகம்மாவும் கடந்த 15 நாட்களாக காணாமல் போயிருந்த நிலையில், அவர்கள் மரத்தில் சேலையில் தூக்குப்போட்டு தற்கொலை செய்து கொண்டதாக முதற்கட்ட தகவல்கள் தெரிவிக்கின்றன. இருப்பினும், இது உண்மையில் தற்கொலையா அல்லது திட்டமிட்டு நடந்த கொலையா என்ற கோணத்தில் போலீசார் பல்வேறு கோணங்களில் விசாரணையை முன்னெடுத்து வருகின்றனர். இந்த சம்பவம் அந்த பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.