அமெரிக்கா மற்றும் இரான் இடையே அதிகரித்து வரும் கடுமையான மோதல்கள் காரணமாக உலகளவில் பெரும் எண்ணெய் தட்டுப்பாடு ஏற்படும் சூழல் உருவாகியுள்ளது. உலகின் ஒட்டுமொத்த கச்சா எண்ணெய் விநியோகத்தில் சுமார் 20 சதவீத பங்கைக் கொண்டுள்ள மிக முக்கியமான கடல் வழித்தடமான ‘ஹோர்முஸ் நீர்ச்சந்தி’ இரான் போர் தொடங்கியதில் இருந்து முற்றிலும் முடங்கியுள்ளது. இந்த சவாலான சூழ்நிலையை எதிர்கொள்ள இந்திய மத்திய அரசு ஒரு பிரம்மாண்டமான மெகா திட்டத்தை வகுத்துள்ளது.

இதன் மூலம், மேற்கு ஆசியாவிலிருந்து ஹோர்முஸ் நீர்ச்சந்தி வழியாக கச்சா எண்ணெய் மற்றும் எரிவாயு விநியோகத்தை மீண்டும் தொடங்குவதற்கான இறுதிப் பணிகளில் இந்தியா தீவிரமாக ஈடுபட்டுள்ளது. மத்திய அரசின் இறுதி அனுமதி கிடைத்தவுடன், பொதுத்துறை நிறுவனமான ஷிப்பிங் கார்ப்பரேஷன் ஆஃப் இந்தியா தனது வணிகக் கப்பல்களை இப்பகுதிக்கு அனுப்பத் தயாராக உள்ளது.

இந்த ஆபத்தான கடல் வழித்தடத்தில் இந்தியக் கப்பல்களின் பாதுகாப்பை உறுதி செய்வதற்காக இந்திய கடற்படை தனது போர்க்கப்பல்களின் எண்ணிக்கையை இருமடங்காக உயர்த்தியதோடு, வான்வழி கண்காணிப்பையும் பலப்படுத்தியுள்ளது. அண்மையில் புதுடெல்லியில் நடைபெற்ற பிரிக்ஸ் மாநாட்டின் போது, இந்திய வெளியுறவுத்துறை அமைச்சர் எஸ். ஜெய்சங்கர் மற்றும் இரான் வெளியுறவுத்துறை அமைச்சர் அப்பாஸ் அராக்சி ஆகியோர் சந்தித்துப் பேசி இந்த கடல்சார் பாதுகாப்பு குறித்து முக்கிய ஆலோசனை நடத்தியுள்ளனர்.

இந்நிலையில் மாற்று வழித்தடங்கள் மிகவும் செலவுமிக்கதாகவும், அதிக நேரத்தை எடுத்துக்கொள்வதாகவும் இருப்பதால், இந்தியாவின் இந்த அதிரடி நடவடிக்கை நாட்டின் எரிசக்தி தேவையைப் பூர்த்தி செய்து, வரவிருக்கும் கடுமையான எண்ணெய் நெருக்கடியிலிருந்து இந்தியப் பொருளாதாரத்திற்கு ஒரு பெரிய நிம்மதியை அளிக்கும் என்று எதிர்பார்க்கப்படுகிறது.