சர்வதேச சந்தையில் நிலவும் கச்சா எண்ணெய் விலை ஏற்ற இறக்கங்களைக் கட்டுப்படுத்தவும், உலகளாவிய பொருளாதார அழுத்தத்தைக் குறைக்கவும் ரஷ்யாவிடமிருந்து எண்ணெய் வாங்க இந்தியாவுக்கு அமெரிக்கா அனுமதி வழங்கியுள்ளது. மத்திய கிழக்கில் நிலவி வரும் போர் பதற்றம் மற்றும் ஹோர்முஸ் நீரிணை மூடப்பட்டதால் ஏற்பட்டுள்ள விநியோகச் சிக்கல்களைக் கருத்தில் கொண்டு இந்த முடிவு எடுக்கப்பட்டுள்ளது.

மேலும் முன்னதாக ரஷ்யாவிடம் இருந்து எண்ணெய் வாங்கியதற்காக இந்தியா மீது விதிக்கப்பட்டிருந்த கூடுதல் வரிகளை, இரு நாடுகளுக்கு இடையேயான பேச்சுவார்த்தைக்குப் பிறகு அமெரிக்கா 50 சதவீதத்தில் இருந்து 18 சதவீதமாகக் குறைத்துள்ளது குறிப்பிடத்தக்கது.

இந்த விவகாரம் குறித்து கருத்து தெரிவித்துள்ள அமெரிக்க அதிபர் டொனால்ட் டிரம்ப், சர்வதேச அளவில் நிலவும் அழுத்தத்தைக் குறைக்க சில தற்காலிக நடவடிக்கைகளை மேற்கொள்ள வேண்டியது அவசியம் என்று குறிப்பிட்டுள்ளார்.

மேலும் அமெரிக்காவிடம் போதுமான அளவு எண்ணெய் இருப்பு உள்ள போதிலும், உலகளாவிய எரிசக்தி தேவையைச் சமன்படுத்த இந்தியாவுக்கு இந்த அனுமதி வழங்கப்பட்டுள்ளதாக அவர் தெரிவித்துள்ளார். இந்தியாவின் எரிசக்தி பாதுகாப்பை உறுதி செய்யவும், சர்வதேச சந்தையில் கச்சா எண்ணெய் விலையை நிலைநிறுத்தவும் எடுக்கப்பட்ட இந்த முக்கியமான ராஜதந்திர நடவடிக்கை உலக நாடுகளின் கவனத்தை ஈர்த்துள்ளது.