காஞ்சிபுரம் மாவட்டம் ஸ்ரீபெரும்புதூர் அருகே செல்போன் பேசிக்கொண்டே சென்ற இளைஞர் ஒருவர், நிலைதடுமாறி நான்காவது மாடியில் இருந்து விழுந்து உயிரிழந்த சம்பவம் பெரும் சோகத்தை ஏற்படுத்தியுள்ளது. தஞ்சாவூர் மாவட்டம் அதிராம்பட்டினத்தைச் சேர்ந்த ஞானசேகர் என்ற இளைஞர், ஸ்ரீபெரும்புதூர் அருகே உள்ள தனியார் தொழிற்சாலையில் பணியாற்றி வந்தார்.
மேலும் மொளச்சூர் பகுதியில் தங்கியிருந்த அவர், தனது வாடகை வீட்டின் நான்காவது மாடிக்கு செல்போனில் பேசியபடி ஏறிச் சென்றபோது, எதிர்பாராதவிதமாக கால் தவறி கீழே விழுந்ததாகக் கூறப்படுகிறது. இந்த விபத்தில் பலத்த காயமடைந்த ஞானசேகர் சம்பவ இடத்திலேயே பரிதாபமாக உயிரிழந்தார்.
இதுகுறித்து தகவலறிந்த சுங்குவார்சத்திரம் காவல்துறையினர் விரைந்து வந்து, உடலைக் கைப்பற்றி பிரேதப் பரிசோதனைக்காக ஸ்ரீபெரும்புதூர் அரசு மருத்துவமனைக்கு அனுப்பி வைத்தனர். செல்போன் கவனச்சிதறலால் நேரிட்ட இந்த துரதிர்ஷ்டவசமான மரணம் அப்பகுதியில் பெரும் சோகத்தை ஏற்படுத்தியுள்ள நிலையில், போலீசார் இது தொடர்பாக வழக்குப்பதிவு செய்து தீவிர விசாரணை மேற்கொண்டு வருகின்றனர்.
