புதுச்சேரியில் உள்ள ‘பிரியாணி அண்ட் கோ’ என்ற பிரபல ஓட்டலில் வாடிக்கையாளர் ஒருவர் சிக்கன் பிரியாணி வாங்கியுள்ளார். அவர் உணவை சாப்பிட முயன்றபோது, பிரியாணியில் ஈ ஒன்று இறந்து கிடப்பதைக் கண்டு அதிர்ச்சியடைந்தார். இதுகுறித்து ஓட்டல் நிர்வாகத்திடம் வாடிக்கையாளர் புகார் அளித்தும், அவர்கள் அலட்சியமாகப் பதிலளித்ததாகக் கூறப்படுகிறது. இதனால் அதிருப்தியும் மன உளைச்சலும் அடைந்த அந்த வாடிக்கையாளர், ஓட்டலின் சேவை குறைபாடு குறித்து உரிய ஆதாரங்களுடன் புதுச்சேரி மாவட்ட நுகர்வோர் குறைதீர் நீதிமன்றத்தில் வழக்கு தொடர்ந்தார்.

இந்த புகாரை முழுமையாக விசாரித்த நுகர்வோர் நீதிமன்ற நீதிபதி, சம்பந்தப்பட்ட ஓட்டலின் சேவை குறைபாட்டை உறுதி செய்தார். இதனையடுத்து, பாதிக்கப்பட்ட வாடிக்கையாளருக்கு ஏற்பட்ட மன உளைச்சலுக்கு நஷ்டஈடாக ரூ.10 ஆயிரமும், வழக்கு செலவுத் தொகையாக ரூ.3 ஆயிரமும் என மொத்தம் ரூ.13 ஆயிரத்தை ஓட்டல் நிர்வாகம் வழங்க வேண்டும் என்று அதிரடி தீர்ப்பளித்தார். மேலும், ஒரு விசித்திரமான உத்தரவாக, பாதிக்கப்பட்ட வாடிக்கையாளருக்கு வரும் வாரங்களில் ஒவ்வொரு ஞாயிற்றுக்கிழமையும் தலா 2 பிளேட் வீதம், தொடர்ந்து 5 வாரங்களுக்கு மொத்தம் 10 பிளேட் பிரியாணியை ஓட்டல் நிர்வாகம் முற்றிலும் இலவசமாக வழங்க வேண்டும் என்றும் நீதிபதி தனது உத்தரவில் குறிப்பிட்டுள்ளார்.