மறைந்த முன்னாள் முதல்வர் அண்ணாவின் 57-ஆவது நினைவு தினத்தையொட்டி, சென்னை மெரினா கடற்கரையில் உள்ள அவரது நினைவிடத்தில் சசிகலா மலர் தூவி மரியாதை செலுத்தினார்.

அப்போது அவரது முன்னிலையில் திரண்டிருந்த ஆதரவாளர்கள், துரோகிகளை வீழ்த்தி சசிகலா தலைமையில் ஆட்சி அமைப்போம் என உறுதிமொழி ஏற்றனர். பின்னர் செய்தியாளர்களிடம் பேசிய சசிகலா, “எதிரிகள் யார், துரோகிகள் யார் என்பது தமிழக மக்களுக்கு நன்றாகவே தெரியும்; வரும் 2026 சட்டமன்றத் தேர்தலில் எனது தலைமையில் நிச்சயம் ‘அம்மா ஆட்சி’ மீண்டும் அமையும்” என்று திட்டவட்டமாகத் தெரிவித்தார்.

நடிகர் விஜய் அதிமுக-வை ‘ஊழல் கட்சி’ என விமர்சித்தது குறித்த கேள்விக்கு, “அதிமுக ஆட்சி எப்படிப்பட்டது என்பதை ஒவ்வொரு குடும்பமும் அறியும்; அதனால்தான் மக்கள் இன்றும் அம்மாவின் ஆட்சியை எதிர்பார்க்கிறார்கள்” எனப் பதிலடி கொடுத்தார்.

மேலும், தேசிய ஜனநாயகக் கூட்டணியில் டி.டி.வி. தினகரன் இணைந்தது குறித்துக் கேட்டபோது, அது அந்தந்த கட்சிகளின் தனிப்பட்ட முடிவு என்றும், அதில் கருத்துச் சொல்ல ஏதுமில்லை என்றும் கூறிப் பேட்டியை முடித்துக் கொண்டார். சசிகலாவின் இந்த அதிரடிப் பேச்சு, 2026 தேர்தல் களம் சூடுபிடித்துள்ளதைக் காட்டுகிறது.