தெலுங்கானாவின் மேடக் மாவட்டம், முத்ராஜ்பள்ளி கிராமத்தில் உள்ள வீட்டொன்றில் ஏற்பட்ட எல்பிஜி சிலிண்டர் வெடிப்பு, பெரும் சேதத்தை ஏற்படுத்தியதுடன், அதிசயமாக ஒரு குடும்பம் உயிருடன் தப்பிய சம்பவம் பரபரப்பை ஏற்படுத்தியுள்ளது.

செப்டம்பர் 8ஆம் தேதி திங்கட்கிழமை மதியம் 12 மணியளவில், அகுலா ஸ்ரீனிவாஸ் என்பவரின் வீட்டில் இந்த வெடிப்பு சம்பவம் நிகழ்ந்தது. சம்பவ நேரத்தில், வீட்டிலிருந்த குடும்பத்தினர் அனைவரும் வீட்டிற்கு வெளியே அமர்ந்திருந்தனர். இதனால் பெரும் விபத்து  தவிர்க்கப்பட்டது.

வீட்டில் இருந்த எல்பிஜி சிலிண்டர் திடீரென வெடித்ததனால், சுவர்கள், கூரை மற்றும் அமைப்புகளில் கடுமையான அதிர்வுகள் ஏற்பட்டன. வீட்டின் மேல்தள கூரைகளும் சுவர்களும் ஒருபொழுதில் இடிந்து விழுந்தன. இந்த அதிர்ச்சிகரமான சம்பவம், அருகிலுள்ள சிசிடிவி கமெராவில் பதிவாகியுள்ளதும் குறிப்பிடத்தக்கது.

 

சிசிடிவி காட்சிகளில், குடும்பத்தினர் வீட்டின் முன்பக்கத்தில் அமைதியாக அமர்ந்திருக்கும் தருணத்தில், உள்ளே இருந்த சிலிண்டர் வெடிக்கிறது. வெடிப்பு ஏற்பட்டவுடன், அந்த வீட்டு கூரை பாகங்கள் சிதறி விழுந்தன. சம்பவத்தால் அப்பகுதி முழுவதும் பரபரப்பான நிலை ஏற்பட்டது.

வீடுகள் ஒன்றுக்கு ஒன்றாக இணைந்துள்ள இப்பகுதியில், மற்றவர்கள் மீது வெடிப்பு தாக்கம் ஏற்படாமல் இருந்தது குறிப்பிடத்தக்கது. வீட்டில் எரிவாயு கசிவால் தீ விபத்து ஏற்பட்டதாகத் தகவல் வெளியாகியுள்ளது.

இந்த சம்பவத்தில், ஸ்ரீனிவாஸ் மற்றும் அவரது குடும்பத்தினர் எந்த காயமுமின்றி  தப்பியுள்ளனர். எனினும், வீடு பெரிதும் சேதமடைந்துள்ளது.

சமூக ஊடகங்களில் இந்த சம்பவத்தின் வீடியோ வேகமாக பரவுகிறது. அதில், வெடிப்புக்கு முன்,  விசிறியுடன் அமர்ந்திருந்த குடும்பத்தினர், வெடிப்பு ஒலியுடன் திடீரென எழுந்து ஓடுவதை காணலாம். இத்தகைய சம்பவங்கள், எல்பிஜி சிலிண்டர் பாதுகாப்பு மீதான விழிப்புணர்வையும், சரியான பராமரிப்பு மற்றும் அறிகுறிகளை கவனிப்பதன் அவசியத்தையும் வலியுறுத்துகின்றன.