ஐபிஎல் 2026 தொடரில் தனது அதிரடி ஆட்டத்தால் ஒட்டுமொத்த கிரிக்கெட் உலகையும் அதிரவைத்து வரும் 15 வயது இளம் வீரர் வைபவ் சூர்யவன்ஷி, விரைவில் இந்திய அணியில் (Team India) அறிமுகமாக உள்ளதாகத் தகவல்கள் வெளியாகியுள்ளன.

வரும் ஜூன் மாதம் நடைபெறவுள்ள அயர்லாந்துக்கு எதிரான டி20 தொடரில் சூர்யவன்ஷியை களமிறக்கத் தேர்வுக்குழு திட்டமிட்டுள்ளது. ஐபிஎல் தொடரில் ஜஸ்பிரித் பும்ரா, ஜோஷ் ஹேசில்வுட் போன்ற உலகத்தரம் வாய்ந்த பந்துவீச்சாளர்களின் பந்துகளைச் சிதறடித்த இவரது துணிச்சலான ஆட்டம், பிசிசிஐ (BCCI) அதிகாரிகளைக் கவர்ந்துள்ளது.

இதுவரை 5 போட்டிகளில் விளையாடியுள்ள இவர், 263.15 என்ற அசுர வேக ஸ்டிரைக் ரேட்டில் ரன்களைக் குவித்து ‘லிட்டில் மாஸ்டர்’ என ரசிகர்களால் கொண்டாடப்படுகிறார்.

அயர்லாந்து தொடரில் வைபவ் சூர்யவன்ஷி அறிமுகமானால், இந்திய கிரிக்கெட் வரலாற்றில் மிக இளம் வயதில் சர்வதேசப் போட்டிகளில் விளையாடிய வீரர் என்ற வரலாற்றுச் சாதனையை அவர் படைப்பார். இதன் மூலம் 16 வயதில் அறிமுகமான ஜாம்பவான் சச்சின் டெண்டுல்கர் மற்றும் ஷபாலி வர்மா ஆகியோரின் சாதனைகளை முறியடிக்க அதிக வாய்ப்புள்ளது.

செலக்டர்கள் இவரை அயர்லாந்து மற்றும் ஜிம்பாப்வே தொடர்களுக்குப் பயன்படுத்தத் திட்டமிட்டு வரும் நிலையில், ஐபிஎல் தலைவர் அருண் துமால் மற்றும் முன்னாள் வீரர் இர்பான் பதான் போன்ற பலரும் இவருக்கு ஆதரவு தெரிவித்துள்ளனர். சச்சின் டெண்டுல்கரின் பல ஆண்டுகால சாதனையை இந்த 15 வயது சிறுவன் தகர்க்கப்போகும் தருணத்திற்காக இந்திய ரசிகர்கள் ஆவலுடன் காத்திருக்கின்றனர்.