கேரளாவைச் சேர்ந்த நபர் ஒருவர், தனக்கு தகுந்த வாழ்க்கைத்  துணையைத் தேர்ந்தெடுப்பதற்காக அங்குள்ள ஒரு பிரபல திருமணத் தகவல் மையத்தை அணுகியுள்ளார். அதற்காக அந்த நிறுவனம் விதித்த கட்டணமான 3,000 ரூபாயைச் செலுத்தி, தனது பெயரையும் முறைப்படி பதிவு செய்துள்ளார். பணம் வாங்கிய கையோடு, மிக விரைவில் உங்கள் தகுதிக்கு ஏற்றாற்போல் நல்லதொரு வரனைத் தேடித் தருவோம் என அந்த நிறுவனம் அவருக்குப் பெரிய அளவில் வாக்குறுதி அளித்துள்ளது.

ஆனால், ஆண்டுகள் பல கடந்தும் அந்த நிறுவனத்திடமிருந்து எந்தவொரு ஆக்கப்பூர்வமான பதிலும் வரவில்லை.  ஒரு வருடம், இரு வருடம் அல்ல.  9 ஆண்டுகள் ஆகியும் அந்த நபருக்குப் பொருத்தமான ஒரு வரனைக் கூட அந்த திருமணத் தகவல் மையத்தால் காட்ட முடியவில்லை. இதனால் மன உளைச்சலுக்கு ஆளான அந்த நபர், தன் பணத்தையும் நேரத்தையும் வீணடித்த நிறுவனத்தின் மீது நடவடிக்கை எடுக்கக் கோரி நுகர்வோர் நீதிமன்றத்தில் வழக்குத் தொடர்ந்தார்.

இந்த வழக்கை விசாரித்த நுகர்வோர் நீதிமன்றம், வாடிக்கையாளரிடம் பணம் பெற்றுக் கொண்டு 9 ஆண்டுகள் ஆகியும் சேவையை வழங்காதது கடுமையான சேவை குறைபாடு என்று சுட்டிக்காட்டியுள்ளது. மேலும், பாதிக்கப்பட்ட நபருக்கு ஏற்பட்ட மன உளைச்சலுக்கு இழப்பீடாக அந்த திருமணத் தகவல் மையம் கணிசமான தொகையை  அபராதமாக வழங்க வேண்டும் என்று அதிரடி தீர்ப்பளித்துள்ளது. இந்த தீர்ப்பு, போலி வாக்குறுதிகளை அளிக்கும் மற்ற மேரேஜ் பீரோக்களுக்கு ஒரு பெரிய பாடமாக அமைந்துள்ளது.