அமெரிக்காவின் நியூயார்க் நகரில் நடைபெற்ற புகழ்பெற்ற ‘ஃபனாடிக்ஸ் ஃபெஸ்ட் 2026’ விளையாட்டுத் திருவிழாவில், என்.எஃப்.எல் கால்பந்து விளையாட்டின் ஜாம்பவான் டாம் பிராடி, டபிள்யூ.டபிள்யூ.ஈ  மல்யுத்த நட்சத்திரமான லோகன் பாலை நேரடி மேடையில் பளாரென அறைந்த சம்பவம் உலக அளவில் பெரும் பரபரப்பை ஏற்படுத்தியுள்ளது. நேற்று வெள்ளிக்கிழமை நேரடி பார்வையாளர்கள் முன்னிலையில் அரங்கேறிய இந்த விசித்திரமான மோதலைக் கண்டு ரசிகர்கள் அதிர்ச்சியில் உறைந்தனர். மேடையில் இருவருக்கும் இடையே வாக்குவாதம் முற்றிய நிலையில், அங்கிருந்த  கூடைப்பந்து நட்சத்திரம் கார்ல்-அந்தோணி டவுன்ஸ் உடனடியாகத் தலையிட்டு இருவரையும் பிரித்து வைத்தார்.

விளையாட்டு மற்றும் பொழுதுபோக்குத் துறையின் முக்கிய நிகழ்வான இந்த விழாவில், டாம் பிராடியும் லோகன் பாலும் நேருக்கு நேர் சந்தித்துப் பேசிக்கொண்டிருந்தனர். அப்போது எதிர்பாராத விதமாக, லோகன் பாலின் தலையின் பக்கவாட்டில் டாம் பிராடி பலமாக அறைந்தார். இந்த மோதல் தொடர்பான வீடியோ சமூக ஊடகங்களில் வெளியாகித் தீயாய் பரவி வருகிறது. இந்த ஆண்டு தொடக்கத்தில் நடைபெற்ற ஒரு கொடி கால்பந்து போட்டியில், டாம் பிராடியின் அணியை லோகன் பாலின் அணி தோற்கடித்தது. அன்றிலிருந்து லோகன் பால், 7 முறை சூப்பர் பவுல் சாம்பியனான டாம் பிராடியை பொதுவெளியில் தொடர்ந்து கிண்டல் செய்து வந்த நிலையில், இந்த மோதல் தற்போது உச்சக்கட்டத்தை எட்டியுள்ளது.

 

மேடை மோதலுக்குப் பிறகும் இவர்களது சண்டை ஓயவில்லை. டாம் பிராடி தனது அதிகாரப்பூர்வ எக்ஸ் (X) சமூக வலைதளப் பக்கத்தில், லோகன் பாலை “ஒரு முட்டாள்” மற்றும் “அறிவில்லாதவர்” என்று  மீண்டும் வம்புக்கு இழுத்துள்ளார். இதனால் இரு தரப்பு ரசிகர்களிடையேயும் வார்த்தைப் போர் தீவிரமடைந்துள்ளது.

இருப்பினும், இந்தத் தாக்குதல் சம்பவம் உண்மையிலேயே கோபத்தில் நடந்ததா அல்லது திட்டமிட்டு நடத்தப்பட்ட நாடகமா என்ற சந்தேகமும் எழுந்துள்ளது. லோகன் பால் ஒரு தொழில்முறை மல்யுத்த வீரர் என்பதாலும், டாம் பிராடி இதற்கு முன்பு WWE போட்டிகளில் பங்கேற்க ஆர்வம் காட்டியிருந்ததாலும், இது WWE வளையத்திற்குள் இவர்களைக் கொண்டு செல்வதற்கான ஒரு விளம்பர உத்தியாக இருக்கலாம் என விளையாட்டு விமர்சகர்கள் கருதுகின்றனர். இந்த மோதல் நிஜமா அல்லது நிழலா என்ற விவாதம் ஒருபுறம் இருக்க, இரு பிரபலங்களுக்கும் இடையிலான பகை அடுத்த கட்டத்திற்குச் சென்றுள்ளது மட்டும் உறுதி.