மத்திய கிழக்கில் நிலவும் கடுமையான போர் பதற்றங்களுக்கு இடையே, ஓமான் கடற்பகுதியில் ‘எம்.டி செட்பெலோ’ என்ற வணிகக் கப்பல் மீது அமெரிக்க ராணுவம் நடத்திய ஏவுகணைத் தாக்குதலில் மூன்று இந்திய மாலுமிகள் உயிரிழந்துள்ளனர். பலாவு நாட்டின் கொடியுடன் பயணித்த இந்த எண்ணெய்க் கப்பலில் மொத்தம் 24 இந்தியர்கள் உட்பட 28 ஊழியர்கள் இருந்தனர்.

இந்த கோரமான சம்பவத்தில் முதற்கட்டமாக இரண்டு இந்திய மாலுமிகளின் உடல்கள் மீட்கப்பட்டு மரணம் உறுதி செய்யப்பட்ட நிலையில், தீவிரமாகத் தேடப்பட்டு வந்த ஆந்திரப் பிரதேசத்தைச் சேர்ந்த தலைமைப் பொறியாளரும் தற்போது உயிரிழந்துவிட்டதாக மத்திய கப்பல் போக்குவரத்துத் துறை அமைச்சர் சர்பானந்தா சோனோவால் அதிகாரப்பூர்வமாக உறுதிப்படுத்தியுள்ளார்.

இதனால் கப்பலில் இருந்த மற்ற 21 இந்திய மாலுமிகள் ஓமான் நாட்டின் உதவியுடன் பத்திரமாக மீட்கப்பட்டு, அவர்களை மீண்டும் தாயகம் அழைத்து வருவதற்கான தீவிர நடவடிக்கைகள் மேற்கொள்ளப்பட்டு வருகின்றன. அமெரிக்காவின் இந்தத் தாக்குதலுக்கு இந்திய வெளியுறவு அமைச்சகம் தனது கடுமையான கண்டனத்தைப் பதிவு செய்துள்ளதோடு, புதுடெல்லியில் உள்ள அமெரிக்க தூதரக அதிகாரியை நேரில் வரவழைத்து தங்களின் பலத்த எதிர்ப்பையும் காட்டியுள்ளது.

இந்நிலையில் இந்தத் தாக்குதலைத் தொடர்ந்து, சர்வதேச அளவில் மிக முக்கியமான கடல்வழிப் பாதையான ஹார்முஸ் நீர்ச்சந்தியை ஈரான் ராணுவம் முற்றிலும் மூடுவதாக அறிவித்துள்ளதால், அப்பகுதியில் பதற்றம் மேலும் உச்சக்கட்டத்தை எட்டியுள்ளது.