உயர்ந்து வரும் மின்சாரக் கட்டணத்தால் கவலையில் இருப்பவர்களுக்கு ஒரு ஆச்சரியமான செய்தி கிடைத்துள்ளது. உங்கள் வீட்டு சமையலறையில் இருக்கும் சாதாரண உருளைக்கிழங்கு ஒரு மாதத்திற்கு உங்கள் வீட்டு மின்விளக்கை ஒளிரச் செய்யும் திறன் கொண்டது என்றால் நம்ப முடிகிறதா? ஜெருசலேமின் ஹீப்ரு பல்கலைக்கழக ஆராய்ச்சியாளர்கள் இதைக் கண்டறிந்துள்ளனர். ஒரு உருளைக்கிழங்கை வெறும் 8 நிமிடங்கள் கொதிக்கும் நீரில் வேகவைப்பதன் மூலம், அதன் திசுக்கள் உடைந்து மின் எதிர்ப்பு (Resistance) குறைகிறது. இதனால் எலக்ட்ரான்கள் எளிதாகப் பாயத் தொடங்கி, பச்சை பேட்டரியாக (Green Battery) மாறுகிறது.

​இந்தத் தொழில்நுட்பம் எப்படிச் செயல்படுகிறது தெரியுமா? உருளைக்கிழங்கு தானாக மின்சாரத்தை உருவாக்குவதில்லை, மாறாக அது ஒரு எலக்ட்ரோலைட்டாகச் செயல்படுகிறது. ஒரு துத்தநாக (Zinc) ஆணி மற்றும் ஒரு செப்பு (Copper) நாணயத்தை உருளைக்கிழங்கில் சொருகும்போது ஏற்படும் வேதிவினையால் மின்சாரம் உருவாகிறது. வேகவைத்த உருளைக்கிழங்கு, பச்சையாக இருப்பதை விட 10 மடங்கு அதிக மின்சாரத்தைத் தருகிறது. சாதாரண பேட்டரிகளை விட இது 50 மடங்கு விலை குறைவானது. மின்சார வசதி இல்லாத கிராமங்களுக்கு இது ஒரு மிகப்பெரிய வரப்பிரசாதமாக அமையும் என ஆராய்ச்சியாளர்கள் கூறுகின்றனர். உருளைக்கிழங்கு அழுகும் வரை இந்த மின்சாரம் தொடர்ந்து கிடைத்துக் கொண்டே இருக்கும் என்பதுதான் இதன் சிறப்பம்சம்!