அதிமுகவில் தங்களை மீண்டும் இணைக்க வேண்டும் என்ற கோரிக்கையைத் தற்காலிகமாகக் கைவிட்டுள்ள ஓ.பன்னீர்செல்வம், வரவிருக்கும் சட்டமன்றத் தேர்தலில் நடிகர் விஜய்யின் தமிழக வெற்றி கழகத்துடன் கூட்டணி அமைக்கத் திட்டமிட்டுள்ளார். இதற்காக நடத்தப்பட்ட ஆலோசனைக் கூட்டத்தில், அதிமுக உரிமை மீட்புக் கழகத்தின் 90 சதவீத மாவட்டச் செயலாளர்கள் இந்தக் கூட்டணிக்குத் தங்கள் ஆதரவைத் தெரிவித்துள்ளனர்.

எடப்பாடி பழனிசாமி தலைமையிலான அதிமுகவில் இணைய இனி வாய்ப்பே இல்லை என்ற நிலைக்கு வந்த ஓபிஎஸ், தற்போதைய அரசியல் சூழலில் விஜய்யுடன் கைகோர்ப்பதே சரியாக இருக்கும் எனத் தீவிரமாகப் பரிசீலித்து வருகிறார். மறுபுறம், பாஜக தலைமையிலான தேசிய ஜனநாயகக் கூட்டணியில் பன்னீர்செல்வம் மற்றும் தினகரன் ஆகியோரைச் சேர்த்து தேர்தலைச் சந்திக்க பேச்சுவார்த்தைகள் நடந்து வந்தன.

பாஜகவுக்கு 23 தொகுதிகளும், பன்னீர்செல்வத்துக்கு 3 தொகுதிகளும் ஒதுக்கப்படலாம் எனத் தகவல் வெளியான நிலையில், திடீரென ஓபிஎஸ் அணி தனது நிலைப்பாட்டை மாற்றியுள்ளது. சமீபத்திய கூட்டத்தில் பேசிய ஓபிஎஸ் மற்றும் வைத்திலிங்கம் ஆகியோர் எடப்பாடி பழனிசாமியை மிகக் கடுமையாக விமர்சித்ததுடன், அவர் இருக்கும் வரை அதிமுகவில் இணையப் போவதில்லை என ஆவேசமாகத் தெரிவித்துள்ளனர். இந்தத் திடீர் மாற்றங்கள் தமிழக அரசியல் களத்தில் பெரும் பரபரப்பை ஏற்படுத்தியுள்ளது.