இந்தியாவில் பெரும்பாலான வீடுகளில் தினமும் ஒருவேளையாவது சாதம் சமைக்கப்படவில்லை என்றால், அந்த உணவே முழுமையடையாததாகக் கருதப்படுகிறது. ஆனால், ‘வெள்ளைச் சோறு சாப்பிட்டால் உடல் எடை அதிகரித்துவிடுமோ’ என்ற கேள்வி பலரது மனதிலும் நீண்ட நாட்களாக இருந்து வருகிறது. இதைப் பற்றிய உண்மையான தகவலையும், நாம் உணவு உண்ணும் முறையில் செய்யும் தவறுகளையும் ஊட்டச்சத்து நிபுணர்கள் தெளிவாக விளக்குகின்றனர்.
வெள்ளைச் சோற்றில் மாவுச்சத்து  அதிகமாக உள்ளது உண்மைதான்.

ஆனால், சாதம் மட்டுமே உடல் எடை அதிகரிப்பதற்கு நேரடியாகக் காரணம் அல்ல என்று நிபுணர்கள் கூறுகின்றனர். நாம் எந்த அளவில் சாதம் சாப்பிடுகிறோம் மற்றும் அதனுடன் என்ன மாதிரியான உணவுகளைச் சேர்த்துக் கொள்கிறோம் என்பதில்தான் எடைக் கட்டுப்பாடு அடங்கியுள்ளது. அளவோடு சாப்பிடும் போது சாதம் உடலுக்குத் தேவையான உடனடி ஆற்றலை அளிக்கிறது.

சாதம் சாப்பிடும் போது பலரும் செய்யும் முக்கியத் தவறு, தட்டில் அதிக அளவில் சாதத்தையும், மிகக் குறைந்த அளவில் காய்கறிகள் அல்லது புரதச் சத்து நிறைந்த உணவுகளையும் எடுத்துக் கொள்வதுதான். இதனால் ரத்தத்தில் சர்க்கரையின் அளவு திடீரென உயர்ந்து, பசி உணர்வு மீண்டும் சீக்கிரமே தூண்டப்படுகிறது. இதன் காரணமாகவே உடல் எடை அதிகரிக்கத் தொடங்குகிறது.

எனவே, உடல் எடையைக் குறைக்க நினைப்பவர்கள் சாதத்தை முற்றிலுமாகத் தவிர்க்க வேண்டிய அவசியமில்லை. தட்டில் சாதத்தின் அளவைக் குறைத்து, அதற்குப் பதிலாகக் காய்கறிகள், கீரைகள், பயறு வகைகள் மற்றும் புரதச் சத்துக்களை அதிகமாகச் சேர்த்துக் கொண்டால், உடல் எடை ஏறாமல் ஆரோக்கியமாக வாழலாம் என்று நிபுணர்கள் அறிவுறுத்துகின்றனர்.