வங்கக்கடலில் தற்போது புதிய காற்றழுத்த தாழ்வு பகுதி ஒன்று உருவாகியுள்ள நிலையில், தமிழகத்தின் கடலோரப் பகுதிகளிலும் அதனை ஒட்டியுள்ள மாவட்டங்களிலும் கனமழைக்கு வாய்ப்புள்ளதாக வானிலை ஆய்வு மையம் தெரிவித்துள்ளது. இதன் காரணமாக, பேரிடர் மேலாண்மைத் துறை ஆனது, கடலூர், மயிலாடுதுறை, நாகை, திருவாரூர், செங்கல்பட்டு, காஞ்சிபுரம், விழுப்புரம், தூத்துக்குடி, நெல்லை, கன்னியாகுமரி ஆகிய 10 மாவட்டங்களின் ஆட்சியர்களுக்கு அவசர அறிவுறுத்தலை வழங்கியுள்ளது.

இந்தச் சூழ்நிலையை எதிர்கொள்ளும் விதமாக, பேரிடர் மேலாண்மைத் துறையின் நிலையான வழிகாட்டு நெறிமுறைகளின் படி, ஏற்படக்கூடிய பேரிடர்களைத் திறம்படச் சமாளிக்க அனைத்துத் துறைகளும் தயார் நிலையில் இருக்க வேண்டும் என அந்தந்த மாவட்ட ஆட்சியர்களுக்கு தெரிவிக்கப்பட்டுள்ளது. இதன் மூலம், அவசர காலங்களில் மீட்பு மற்றும் நிவாரணப் பணிகளை விரைந்து மேற்கொள்வதற்குத் தேவையான அனைத்து ஏற்பாடுகளையும் மாவட்ட நிர்வாகங்கள் முடுக்கிவிட்டுள்ளன.