பீகார் மாநிலம் போஜ்பூர் மாவட்டத்தில் ஒரு தந்தை தனது நான்கு குழந்தைகளுக்கும் விஷம் கலந்து உணவளித்த சம்பவம் பெரும் அதிர்ச்சியை ஏற்படுத்தியுள்ளது. இதில் மூன்று குழந்தைகள் உயிரிழந்துள்ள நிலையில், அந்த தந்தையும், அவரது சிறிய மகனும் மருத்துவமனையில் சிகிச்சை பெற்று வருகின்றனர். அரவிந்த் குமார் என்ற மின்னணுப் பொருள் வியாபாரி, பால்வனியா கிராமத்தில் உள்ள தனது வீட்டில், உணவில் விஷம் கலந்து, தனது இரண்டு மகன்களுக்கும், இரண்டு மகள்களுக்கும் கொடுத்ததாக போலீசார் தெரிவித்துள்ளனர்.
இச்சம்பவம் புதன்கிழமை வெளிச்சத்திற்குக் கொண்டு வரப்பட்டது, அப்போது அரவிந்த் அவர்களின் அறை உள்ளிருந்து பூட்டப்பட்டிருந்ததை உறவினர்கள் கவனித்தனர். கதவை உடைத்த பிறகு, அரவிந்த் மற்றும் அவரது நான்கு குழந்தைகள் மயக்க நிலையில் படுக்கையில் கிடப்பதை கண்டனர். உடனடியாக அனைவரையும் அரசு மருத்துவமனைக்கு கொண்டு சென்றனர். ஆனால் மூன்று குழந்தைகள் மருத்துவமனைக்கு செல்லும் முன்பே உயிரிழந்ததாக அறிவிக்கப்பட்டது. அரவிந்த் மற்றும் அவரது 5 வயது மகன் ஆதர்ஷ் குமார் தற்போது சிகிச்சை பெற்று வருகின்றனர்.
மருத்துவர்கள், அனைவரும் பூச்சி மருந்து கலந்த உணவை உட்கொண்டதாக உறுதிப்படுத்தினர். மரணமடைந்த குழந்தைகளின் உடல் உறுப்புகள் பட்னா மாநில நுண்ணிய அறிவியல் ஆய்வு கூடத்திற்கு (Forensic Lab) அனுப்பப்படும் என அரசு மருத்துவமனை தகவல் தெரிவித்துள்ளது. உயிரிழந்த குழந்தைகள் – நந்தினி குமாரி (12), டாலி (5), மற்றும் டோனி குமார் (6) என அடையாளம் காணப்பட்டுள்ளனர். குடும்பத்தினர், இந்த சம்பவம் நடந்தபோது, வீட்டிலுள்ள மற்றவர்களெல்லாம் திருமண நிகழ்ச்சியில் ஈடுபட்டிருந்ததாக தெரிவித்துள்ளனர்.
அரவிந்தின் மனைவி கடந்த ஆண்டு வீட்டின் மேல்தளத்தில் இருந்து விழுந்து உயிரிழந்துள்ளார். இதனால், அரவிந்த் கடுமையான மன அழுத்தத்தில் இருந்திருக்கலாம் என அவரது உறவினர்கள் தெரிவித்துள்ளனர். முதற்கட்ட விசாரணையில், அரவிந்த் முதலில் தனது குழந்தைகளுக்கு விஷம் கலந்து உணவளித்த பிறகு, தன் உயிரை மாய்த்துக்கொள்ள முயன்றதாக போலீசார் தெரிவித்துள்ளனர்.
