“தமிழகத்தில் நிலவும் வெறுப்பு அரசியலை அகற்றி, மக்களுக்குச் சேவை செய்யும் நன்றிக்கடனாகவே தாம் அரசியலில் அடியெடுத்து வைத்திருப்பதாக” தமிழக வெற்றிக் கழகத்தின் (தவெக) தலைவர் விஜய் தெரிவித்துள்ளார். சேலம் சீலநாயக்கன்பட்டி பகுதியில்  நடைபெறும்  அக்கட்சியின் தேர்தல் பரப்புரை மற்றும் நிர்வாகிகள் ஆலோசனைக் கூட்டத்தில் அவர் ஆற்றிய உரையில், பிறரைத் தாழ்த்திப் பேசும் அரசியலில் தமக்கு உடன்பாடில்லை என்பதைத் தெள்ளத்தெளிவாகப் பதிவு செய்தார்.

எதிர்வரும் 2026 சட்டப்பேரவைத் தேர்தலை முன்னிறுத்தி உரையாற்றிய அவர், “வெறுப்பு அரசியல் செய்வதற்காக நான் பொதுவாழ்விற்கு வரவில்லை; மாறாக, இத்தனை காலம் எனக்குப் பேராதரவு அளித்த மக்களுக்கு என் உழைப்பின் மூலம் நன்றிக்கடன் செலுத்தவே வந்துள்ளேன்” என நெகிழ்ச்சியுடன் குறிப்பிட்டார். மேலும், தனது அரசியல் பயணம் ஆக்கபூர்வமான மாற்றத்தை நோக்கியே இருக்கும் என உறுதியளித்த அவர், தொண்டர்கள் கண்ணியத்துடன் மக்கள் பணியாற்றி வெற்றியை ஈட்ட வேண்டும் என அறைகூவல் விடுத்தார்.