இன்றைய இளைஞர்களிடையே சமூக வலைத்தளங்களில் லைக்குகளையும், பார்வைகளையும் பெறுவதற்காகத் தங்களது உயிரையே பணயம் வைக்கும் கலாச்சாரம் ஆபத்தான முறையில் அதிகரித்து வருகிறது. குறிப்பாக, பெரிய நகரங்களில் நள்ளிரவு நேரங்களில் சாலைகளில் அதிவேகமாகச் சென்று ஸ்டண்ட் செய்வது பொதுமக்களுக்கு பெரும் அச்சத்தை ஏற்படுத்தி வருகிறது.

அந்த வகையில், மகாராஷ்டிர மாநிலம் புனே நகரில் நள்ளிரவில் மதுபோதையில் வெளிமாநில வாலிபர்கள் சிலர் அதிவேகமாகச் சென்ற காரில் இருந்து வெளியே தொங்கியபடி உயிரைப் பணயம் வைத்துச் செய்த கொடூர ஸ்டண்ட் வீடியோ சமூக வலைத்தளங்களில் பரவி பெரும் கொந்தளிப்பை ஏற்படுத்தியுள்ளது.

புனேயின் பிரதான சாலை ஒன்றில் நள்ளிரவு நேரத்தில் சென்று கொண்டிருந்த அந்த காரில், வெளிமாநிலத்தைச் சேர்ந்த இளைஞர்கள் சிலர் அதிக அளவில் மது அருந்தியிருந்ததாகக் கூறப்படுகிறது. மதுபோதையின் உச்சத்தில் இருந்த அந்த வாலிபர்கள், அதிவேகமாகச் சென்று கொண்டிருந்த காரின் கதவுகள் மற்றும் ஜன்னல்கள் வழியே வெளியே தொங்கியபடியும், காரின் மேல்பகுதியில் நின்றபடியும் ஆபத்தான முறையில் சாகசங்களில் ஈடுபட்டுள்ளனர்.

சாலையோரங்களில் சென்ற மற்ற வாகன ஓட்டிகளையும் பொதுமக்களையும் அச்சுறுத்தும் வகையில் கூச்சலிட்டுக்கொண்டு, தங்களது உயிரையும் மற்றவர்களின் உயிரையும் துச்சமாக நினைத்து அவர்கள் செய்த இந்தச் செயல் அங்கிருந்த சிசிடிவி மற்றும் சக பயணிகளின் மொபைல் கேமராவில் பதிவாகியுள்ளது.

இந்தக் கொடூரமான ஸ்டண்ட் வீடியோ இணையத்தில் தீயாகப் பரவியதைத் தொடர்ந்து, பொதுமக்கள் மற்றும் சமூக ஆர்வலர்கள் கடும் அதிர்ச்சியையும் ஆத்திரத்தையும் வெளிப்படுத்தி வருகின்றனர். புனே காவல்துறையினர் இந்த வீடியோவின் அடிப்படையில் உடனடியாக வழக்குப்பதிவு செய்து, காரின் பதிவு எண்ணைக் கொண்டு சம்பந்தப்பட்ட வெளிமாநில வாலிபர்களைத் தீவிரமாகத் தேடி வருகின்றனர்.

போதை ஆசையினாலும், விளம்பர மோகத்தினாலும் இதுபோன்ற ஆபத்தான செயல்களில் ஈடுபடும் நபர்களுக்குக் கடுமையான தண்டனை வழங்கி, அவர்களின் ஓட்டுநர் உரிமத்தை ரத்து செய்ய வேண்டும் எனப் பொதுமக்கள் கோரிக்கை விடுத்து வருகின்றனர்.

“>