உலக நுரையீரல் புற்றுநோய் விழிப்புணர்வு தினத்தை முன்னிட்டு, நமது உடலின் மிக முக்கிய உறுப்புகளான நுரையீரல் மற்றும் இதயத்தின் ஆரோக்கியம் குறித்து விரிவாகப் புரிந்துகொள்வது அவசியமாகிறது. பல நேரங்களில் நமக்குத் திடீரென மூச்சுத் திணறல் அல்லது மூச்சு வாங்குதல் ஏற்படும்போது, பெரும்பாலானவர்கள் உடனடியாக அது ஏதேனும் இதயச் சார்ந்த நோயாகத்தான் இருக்கும் என்று எண்ணி அஞ்சுகிறார்கள்.

ஆனால், உண்மையான காரணம் என்னவென்றால், திடீர் மூச்சுத் திணறலுக்கு இதயப் பிரச்சினைகள் மட்டுமன்றி, நுரையீரல் சார்ந்த கடுமையான கோளாறுகளும் முக்கியக் காரணமாக இருக்கலாம். ஒருவருக்குத் திடீரென மூச்சு விடுவதில் சிரமம் ஏற்படுவதற்கு நுரையீரல் எவ்வாறு காரணமாகிறது என்பதைப் பார்ப்போம்.

நுரையீரலில் ஏற்படும் அழற்சி, ஆஸ்துமா, சி.ஓ.பி.டி   எனப்படும் நாட்பட்ட நுரையீரல் அடைப்பு நோய், தொற்றுநோய்கள் மற்றும் நுரையீரல் புற்றுநோய் போன்ற ஆபத்தான பாதிப்புகள் இருக்கும்போது மூச்சுத் திணறல் முதன்மை அறிகுறியாக வெளிப்படுகிறது. நுரையீரல் தனது இயல்பு திறனை இழந்து, உடலுக்குத் தேவையான ஆக்ஸிஜனைச் சரியாக உறிஞ்ச முடியாமல் போகும்போது, உடனே இந்த மூச்சு திணறல் உணர்வு ஏற்படுகிறது.

அதேவேளையில், இதயத்தில் ஏற்படும் ரத்த ஓட்டக் கோளாறுகள், மாரடைப்பு அல்லது இதயச் செயலிழப்பு போன்ற காரணங்களாலும் மூச்சுத் திணறல் உண்டாக வாய்ப்புள்ளது. ஏனெனில், இதயம் திறம்பட செயல்படாதபோது நுரையீரலுக்குச் செல்லும் ரத்த ஓட்டம் பாதிக்கப்பட்டு அங்கு திரவம் தேங்கத் தொடங்குகிறது. இதனால் நுரையீரல் சரியாக விரிய முடியாமல் போகும்போதும் மனிதர்களுக்கு மூச்சு வாங்கும் உணர்வு உண்டாகிறது.

எனவே, மூச்சுத் திணறல் என்பது இதயம் மற்றும் நுரையீரல் ஆகிய இரண்டு உறுப்புகளுடனும் நேரடியாகத் தொடர்புடைய ஒரு முக்கியமான அறிகுறியாகும்.எனவே, திடீரென ஏற்படும் மூச்சுத் திணறலை சாதாரண விஷயமாக எடுத்துக்கொண்டு அலட்சியமாக இருக்கக் கூடாது.

குறிப்பாக, மூச்சுத் திணறலுடன் சேர்ந்து நெஞ்சு வலி, அளவுக்கு அதிகமான சோர்வு, விடாத இருமல் அல்லது பாதங்களில் வீக்கம் போன்ற அறிகுறிகள் தென்பட்டால் தாமதிக்காமல் உடனடியாக மருத்துவரை அணுகிப் பரிசோதனை செய்துகொள்வது மிகவும் அவசியமாகும். சரியான நேரத்தில் எடுக்கப்படும் மருத்துவ ஆலோசனையும் பரிசோதனையும் நுரையீரல் மற்றும் இதயப் பாதிப்புகளில் இருந்து நம்மைக் காக்கும்.