தமிழக அரசியலில் தற்பொழுது மிகப்பெரிய பேசுபொருளாக மாறியிருப்பது அண்ணாமலையின் புதிய இயக்கமும், மெகா உறுப்பினர் சேர்க்கையும்தான். இந்நிலையில், பிரபல நடிகரும் இயக்குனருமான ராகவா லாரன்ஸிடம், “அண்ணாமலை அரசியலில் புதிய வியூகம் அமைத்து, தனியாகக் கட்சி ஆரம்பிப்பதற்கான வேலைகளைப் பார்த்து வருகிறாரே, அதை நீங்கள் எப்படிப் பார்க்கிறீர்கள்?” எனச் செய்தியாளர்கள் அதிரடிக் கேள்வி ஒன்றை எழுப்பினர்.

இந்தக் கேள்விக்கு ராகவா லாரன்ஸ் எந்தவித ஒளிவுமறைவும் இன்றி அண்ணாமலையைத் தாராளமாகப் பாராட்டிப் பேசியுள்ளார். அரசியலுக்கு யார் வேண்டுமானாலும் வரலாம் என்றும், மக்களுக்கு நல்லது செய்ய இங்கு எல்லாருக்குமே உரிமை இருக்கிறது என்றும் அவர் சுட்டிக்காட்டியுள்ளார். குறிப்பாக அண்ணாமலையைப் பொறுத்தவரை அவர் நன்றாகப் படித்தவர் என்றும், சிறந்த அரசியல் புரிதல் இருக்கிற ஒரு நபர் என்றும் லாரன்ஸ் புகழாரம் சூட்டியுள்ளார்.

அரசியலுக்கு இதுபோல புதுப்புது ஆட்கள் வருவது நாட்டிற்கு நல்லதுதான் என்று தெரிவித்த ராகவா லாரன்ஸ், அண்ணாமலையின் புதிய அரசியல் பயணத்திற்குத் தனது வாழ்த்துகளையும் (All The Best) தெரிவித்துக் கொண்டுள்ளார். அண்ணாமலைக்கும் திராவிட கட்சிகளுக்கும் இடையே மோதல் முற்றியுள்ள நிலையில், ராகவா லாரன்ஸ் அண்ணாமலையை ஆதரித்துப் பேசியுள்ளது சினிமா மற்றும் அரசியல் வட்டாரத்தில் புது சலசலப்பை ஏற்படுத்தியுள்ளது.