அமெரிக்காவில் நுகர்வோர் விலைக் குறியீட்டின்  அடிப்படையிலான பணவீக்கம் ஆண்டுக்கு ஆண்டு 4.2 சதவீதமாக உயர்ந்துள்ளது அதிர்ச்சியை ஏற்படுத்தியுள்ளது. இது முந்தைய மாதத்தின் 3.8 சதவீத உயர்வை விட அதிகமாகும். மேலும், கடந்த ஏப்ரல் 2023-க்குப் பிறகு பதிவான மிக உயர்ந்த பணவீக்க அளவு இது என்பது குறிப்பிடத்தக்கது. இந்த திடீர் விலையேற்றம் அமெரிக்கப் பொதுமக்களிடையே பெரும் கவலையை ஏற்படுத்தியுள்ள நிலையில், இது தொடர்பாக அந்நாட்டு அரசியல் வட்டாரத்தில் தற்போது கடுமையான விவாதங்களும், விமர்சனங்களும் கிளம்பியுள்ளன.

முன்னாள் அதிபர் டொனால்ட் டிரம்பின் பணவீக்கம் குறித்த சமீபத்திய கருத்து, இந்த அரசியல் மோதலை மேலும் சூடாக்கியுள்ளது. குடியரசுக் கட்சியைச் சேர்ந்த பிரதிநிதிகள் சபை தலைவர் மைக் ஜான்சன், “டிரம்பின் கருத்துக்கள் சூழலில் இருந்து பிரித்து, தவறாகப் புரிந்து கொள்ளப்பட்டுள்ளன” என்று அவருக்கு ஆதரவாக வாதிட்டார். ஆனால், இதனை கடுமையாக மறுத்துள்ள செனட் சபையின் ஜனநாயகக் கட்சி சிறுபான்மை தலைவர் சக் ஷுமர், “டிரம்பின் பேச்சு அமெரிக்கக் குடும்பங்கள் எதிர்கொள்ளும் நிதிப் போராட்டங்கள் மீதான அவரது வெறுப்பையே வெளிப்படுத்துகிறது” எனச் சாடியுள்ளார். மேலும், “டிரம்ப் கேமரா முன்னால், ‘நான் பணவீக்கத்தை விரும்புகிறேன்’ என்று ஒட்டுமொத்த அமெரிக்காவும் கேட்கும்படி கூறியுள்ளார்; மக்கள் மீதான அவரது அவமதிப்புக்கு எல்லையே இல்லை” என்று தனது ‘எக்ஸ்’  சமூக வலைத்தளப் பக்கத்தில் ஷூமர் மிகக் காட்டமாகப் பதிவிட்டுள்ளார்.