ஆப்பிரிக்க கண்டத்தில் உள்ள காங்கோ நாட்டில் மீண்டும் தீவிரமாகப் பரவத் தொடங்கியுள்ள எபோலா வைரஸ் நோய்த்தொற்று உலக நாடுகளிடையே பெரும் கவலையை ஏற்படுத்தியுள்ளது.

1976ஆம் ஆண்டு முதல் காங்கோவை அச்சுறுத்தி வரும் இந்த கொடிய நோய், தற்போது 17-வது முறையாக மீண்டும் அங்கு பரவ ஆரம்பித்துள்ளதாக ஆப்பிரிக்க உயர்மட்ட சுகாதார அமைப்பு அதிகாரப்பூர்வமாகத் தெரிவித்துள்ளது.

இந்த புதிய அலையின் காரணமாக இதுவரை 246 நபர்கள் மிகக் கடுமையான பாதிப்புக்கு உள்ளாகியுள்ளனர் என்ற அதிர்ச்சித் தகவலும் வெளியாகியுள்ளது. வாந்தி, இரத்தம் மற்றும் விந்து போன்ற உடல் திரவங்கள் மூலம் மனிதர்களிடையே மிக எளிதில் பரவக்கூடிய இந்த எபோலா வைரஸ், பெரும்பாலும் உயிரிழப்பை ஏற்படுத்தக்கூடிய ஒரு கொடூரமான நோய்த்தொற்றாகும்.

காங்கோவில் இதற்கு முன்பு கடைசியாகப் பரவிய எபோலா அலையின்போது 43 நபர்கள் உயிரிழந்த நிலையில், தற்போது ஏற்பட்டுள்ள புதிய பாதிப்பால் பலி எண்ணிக்கை 65 ஆக உயர்ந்துள்ளது. இந்தத் திடீர் பரவலைக் கட்டுப்படுத்தவும், மேலும் உயிர்பலிகள் ஏற்படுவதைத் தடுக்கவும் சர்வதேச சுகாதார அமைப்புகள் தீவிர நடவடிக்கைகளை மேற்கொண்டு வருகின்றன.