தமிழக அரசியலில் தற்போதைய ஹாட் டாபிக், திமுக மாணவரணி செயலாளர் வீரமணி ஜெயக்குமார் நடிகர் விஜய் மற்றும் அவரது ரசிகர்களை நோக்கி வீசியுள்ள ‘தற்குறி’ ஏவுகணைதான். தமிழக இளைஞர்கள் தங்களின் அறிவுசார் பாதையை மறந்து, வெறும் வெளித்தோற்றத்தைப் பார்த்து மயங்கிப் போவதாக அவர் மிகக் கடுமையாகச் சாடியுள்ளார். “வெள்ளையாகவும் அழகாகவும் இருந்தால் ஓட்டுப் போட்டுவிடுவார்களா?” என்ற இவரது கேள்வி விஜய் ரசிகர்களிடையே பெரும் கொந்தளிப்பை ஏற்படுத்தியுள்ள நிலையில், ஒரு புதிய கோணத்தில் விஜய் கட்சிக்கு அவர் ‘நன்றி’யும் தெரிவித்துள்ளார்.
தமிழகத்தில் இப்படியும் ஒரு ‘தற்குறி’ இளைஞர் கூட்டம் இருப்பதை அடையாளம் காட்டியதற்காக விஜய் கட்சிக்கு நன்றி தெரிவிப்பதாகக் கூறிய அவர், இவர்களைச் சீரமைக்க வேண்டிய பொறுப்பு இப்போது திமுகவிற்கு வந்துள்ளதாகத் தெரிவித்துள்ளார். திமுக தனது மாணவர் சக்தியை இழந்துவிட்டதா என்ற கேள்விக்கு, “எங்கள் இளைஞர்கள் பலமாகவே இருக்கிறார்கள்; தடம் மாறிப் போனவர்களைத் தரம் உயர்த்தவே இந்தப் போராட்டமே தவிர, திமுக என்றும் பலத்தை இழந்ததில்லை” என வீரமணி ஜெயக்குமார் பதிலளித்துள்ளார். அறிவு மரபுக்கும், சினிமா கவர்ச்சிக்கும் இடையிலான இந்தப் போர் இப்போது சமூக வலைதளங்களில் விவாதப் பொருளாக மாறியுள்ளது.
