ஐக்கிய அரபு அமீரகத்தின் ரஸ் அல் கைமா கடற்பகுதியில் சென்று கொண்டிருந்த சரக்குக் கப்பல் ஒன்று மர்மப் பொருள் தாக்கியதில் சேதமடைந்துள்ளதாக ஐக்கிய ராஜ்ய கடல்சார் வர்த்தக நடவடிக்கைகள் அமைப்பு தெரிவித்துள்ளது. ரஸ் அல் கைமாவிற்கு வடமேற்கே சுமார் 25 கடல் மைல் தொலைவில் இந்தச் சம்பவம் நிகழ்ந்துள்ளது.

அடையாளம் தெரியாத ஏதோ ஒரு பொருள் தாக்கியதில் கப்பல் சேதமடைந்துள்ளதாகவும் இருப்பினும் கப்பலில் உள்ள ஊழியர்கள் அனைவரும் பாதுகாப்பாக இருப்பதாகவும் கப்பலின் கேப்டன் உறுதிப்படுத்தியுள்ளார்.

சேதத்தின் அளவு குறித்துத் தற்பொழுது ஆய்வு செய்யப்பட்டு வரும் நிலையில் அந்தப் பகுதியில் பயணிக்கும் மற்ற கப்பல்கள் மிகுந்த எச்சரிக்கையுடன் இருக்க வேண்டும் என்றும் சந்தேகத்திற்குரிய நடமாட்டங்கள் இருந்தால் உடனடியாகத் தகவல் தெரிவிக்க வேண்டும் என்றும் அறிவுறுத்தப்பட்டுள்ளது.

இதற்கிடையே உலக நாடுகளுக்கு எரிசக்தி விநியோகம் செய்யப்படும் மிக முக்கியமான கடல் வழிப் பாதையான ஹார்முஸ் ஜலசந்தியின் மீது தங்களுக்கு முழுமையான கட்டுப்பாடு இருப்பதாக ஈரான் நாட்டுப் புரட்சிகர பாதுகாப்புப் படை அறிவித்துள்ளது.

இந்தப் பகுதியில் பதற்றம் அதிகரித்துள்ள நிலையில் அங்கு கண்ணிவெடிகளைப் பதிக்கும் முயற்சியில் ஈடுபட்டிருந்த ஈரானின் ஒரு டஜன் கப்பல்களைத் தாங்கள் அழித்துவிட்டதாக அமெரிக்கா தெரிவித்துள்ளது. ஹார்முஸ் ஜலசந்தியை முடக்கும் முயற்சியைத் தடுக்கும் நோக்கில் இந்த அதிரடி நடவடிக்கை எடுக்கப்பட்டதாக அமெரிக்கத் தரப்பில் விளக்கமளிக்கப்பட்டுள்ளது.

உலகளாவிய எரிசக்தி விநியோகச் சங்கிலியில் பெரும் பாதிப்பை ஏற்படுத்தக்கூடிய இந்த மோதல் போக்கு சர்வதேசச் சந்தையில் பெரும் கவலையை ஏற்படுத்தியுள்ளது.