கேரளா மாநிலம் திருவல்லாவில், ஸ்பா உரிமையாளர் மாமூல் தர மறுத்ததால் அங்கிருந்த பெண் ஊழியர் ஆறு பேர் கொண்ட கும்பலால் கூட்டு பாலியல் வன்கொடுமைக்கு உள்ளாக்கப்பட்டுள்ள சம்பவம் பெரும் அதிர்ச்சியை ஏற்படுத்தியுள்ளது. இந்த கொடூர சம்பவம் தொடர்பாக இரண்டு பேரை காவல்துறையினர் தற்போது கைது செய்துள்ளனர்.
மேலும் அந்த ஸ்பாவிற்கு வந்த கும்பல், உரிமையாளரிடம் பணம் கேட்டு மிரட்டியதாகவும், அவர் அதற்கு உடன்படாத நிலையில் ஆத்திரமடைந்த அவர்கள் அங்கிருந்த ஊழியரைத் தாக்கி இந்த விபரீத செயலில் ஈடுபட்டதாகவும் முதற்கட்ட தகவல்கள் தெரிவிக்கின்றன. இந்த சம்பவம் குறித்து வழக்குப்பதிவு செய்துள்ள கேரள காவல்துறையினர், தலைமறைவாக உள்ள மற்ற நான்கு குற்றவாளிகளைத் தீவிரமாகத் தேடி வருகின்றனர்.
இந்நிலையில் பாதிக்கப்பட்ட பெண் தற்போது மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார். இந்த கொடூரமான தாக்குதல் கேரளாவில் பெண் பாதுகாப்பு குறித்த அச்சத்தை மீண்டும் எழுப்பியுள்ளது. குற்றவாளிகள் மீது கடும் நடவடிக்கை எடுக்கப்படும் என்றும், விரைவில் அனைவரும் சட்டத்தின் முன் நிறுத்தப்படுவார்கள் என்றும் காவல்துறை தரப்பில் உறுதி அளிக்கப்பட்டுள்ளது.
