தமிழக வெற்றிக்கு கழகத் தலைவர் விஜய் விடுத்துள்ள அறிக்கையில், காஞ்சிபுரம், புதுச்சேரி மற்றும் ஈரோடு ஆகிய இடங்களில் நடைபெற்ற மக்கள் சந்திப்பு நிகழ்வுகள் பெரும் நெருக்கடிகளுக்கு மத்தியிலும் மிக வெற்றிகரமாக முடிந்ததாகக் குறிப்பிட்டுள்ளார். குறிப்பாக, ஈரோடு கூட்டத்திற்கு விதிக்கப்பட்ட கடும் கட்டுப்பாடுகளையும் தடைகளையும் மீறி மக்கள் காட்டிய அதீத அன்பு, அரசியல் எதிரிகளைத் திணறச் செய்துள்ளதாக அவர் கூறியுள்ளார்.
தி.மு.க-வினரின் விமர்சனங்களைப் பற்றிக் குறிப்பிட்ட அவர், கடந்த காலங்களில் பா.ஜ.க-வுடன் கூட்டணி வைத்திருந்ததை மறைத்துவிட்டு, இப்போது மற்றவர்களை ‘அடிமை’ என்று பேசுவது வேடிக்கையாக இருப்பதாகவும், அவர்களின் செயல்பாடுகள் மக்களிடையே அம்பலமாகிவிட்டதாகவும் கடுமையாக விமர்சித்துள்ளார்.
இனிவரும் காலங்களில் எதிரிகளின் வீணான விமர்சனங்களைப் புறந்தள்ளிவிட்டு, மக்கள் பணியில் முழு கவனத்தைச் செலுத்த வேண்டும் என்று தொண்டர்களுக்கு அவர் வேண்டுகோள் விடுத்துள்ளார். குறிப்பாக, வாக்காளர் பட்டியலில் தகுதி உள்ள அனைவரின் பெயர்களும் சேர்க்கப்பட்டிருப்பதை உறுதி செய்ய வேண்டும் என்றும், புதிய வாக்காளர்களைச் சேர்ப்பதில் கழகத் தோழர்கள் தீவிரமாக உழைக்க வேண்டும் என்றும் அறிவுறுத்தியுள்ளார்.
தமிழகத்தின் ஒவ்வொரு வீட்டின் வாக்குகளும் த.வெ.க-விற்கே கிடைப்பதை உறுதி செய்யும் வகையில், ராணுவக் கட்டுப்பாட்டுடனும் விவேகத்துடனும் களப்பணியாற்றி வெற்றியைச் சரித்திரமாக்க வேண்டும் என்று அவர் தனது அறிக்கையில் வலியுறுத்தியுள்ளார்.
