சத்தீஸ்கர் மாநிலம் கான்கேர் மாவட்டத்தில் உள்ள ஒரு அரசுப் பள்ளியில், நள்ளிரவில் புகுந்த கரடி ஒன்று பள்ளியின் கதவை உடைத்து உள்ளே சென்றது பெரும் பரபரப்பை ஏற்படுத்தியுள்ளது. அதே பள்ளியில் தங்கியிருந்த 11 வயது சிறுவன் ஒருவன், கரடியின் சத்தத்தைக் கேட்டு திடுக்கிட்டு எழுந்துள்ளான்.

கண் இமைக்கும் நேரத்தில் கரடி தன் முன்னே நிற்பதைக் கண்டு உறைந்து போன சிறுவன், சற்றும் பதற்றமடையாமல் தனது உயிரைக் காக்க ஒரு தந்திரத்தைக் கையாண்டான். கரடியின் கவனத்தைத் திசைதிருப்ப அங்கிருந்த ஒரு போர்வையை அதன் மீது வீசிவிட்டு, மின்னல் வேகத்தில் அறையை விட்டு வெளியேறி கதவை வெளிப்பக்கமாகப் பூட்டினான்.

மேலும் சிறுவனின் இந்த அபாரமான சமயோசித புத்தி அவனது உயிரைக் காப்பாற்றியது மட்டுமல்லாமல், கரடியை அறைக்குள் சிறைபிடிக்கவும் உதவியது. காலையில் தகவல் அறிந்து வந்த வனத்துறையினர், சுமார் நான்கு மணி நேரப் போராட்டத்திற்குப் பிறகு கரடியைப் பாதுகாப்பாகப் பிடித்து அடர்ந்த காட்டுப் பகுதிக்குள் விட்டனர்.

அந்தச் சிறுவனின் தைரியத்தையும், இக்கட்டான சூழலில் அவன் காட்டிய பொறுமையையும் கண்டு ஊர் மக்களும் அதிகாரிகளும் வியந்து பாராட்டி வருகின்றனர். “சாவு நிச்சயம்” என்ற நிலையில் இருந்து ஒரு சிறுவன் சாதுரியமாகத் தப்பித்த இந்தச் சம்பவம் அப்பகுதியில் பெரும் பேசுபொருளாகியுள்ளது.